ԵՐԵՎԱՆ, 22 նոյեմբերի-Sputnik. Գոհար Սարգսյան. Հանրապետության ամբողջ տարածքում նկատվում է սուր շնչառական վարակների ակտիվացում։ Առողջապահության նախարարությունն առաջարկել է իրականացնել համաճարակաբանական ֆիլտր, այսինքն` մանկապարտեզներում և դպրոցներում բացառել սուր շնչառական վարակներով երեխաների մուտքը։
Դպրոցների մուտքի մոտ առավոտյան պարտաճանաչ կերպով կանգնում են բուժքույրերն ու ստուգում դպրոց մտնող երեխաների առողջական վիճակը։
«Ամեն երեկո դասղեկները ծնողների հետ կապ են հաստատում և տեղեկանում` երեխաներն ինչ վիճակում են, առաջին նախանշանների դեպքում հորդորում են դպրոց չբերել։ Իսկ բուժքույրը հենց մուտքի մոտ ստուգում է բոլորին։ Երբ նա տեսնում է վատ ինքնազգացողությամբ երեխայի, ուղարկում է տուն և զանգահարում ծնողին»,- պատմեց Ստեփան Շահումյանի անվան դպրոցի տնօրեն Կարինե Սաքանյանը։
Չարենցի անվան դպրոցում էլ հենց բուժքրոջն են տուն ուղարկել, որովհետև գրիպի նախանշաններ են նկատել։ Այս մասին Sputnik Արմենիայի հետ զրույցում պատմեց դպրոցի տնօրեն Անահիտ Խեչումյանը։
ՀՀ առողջապահության նախարարության «Հիվանդությունների վերահսկողության և կանխարգելման ազգային կենտրոն»-ի շնչառական վարակների և առանձնապես վտանգավոր վարակիչ հիվանդությունների բաժնի պետ Լիանա Թորոսյանը հիշեցրեց` դեռևս մեկ շաբաթ առաջ էր նախարարությունը բարձրաձայնել էր գրիպի և սուր շնչառական վարակների սեզոնային ակտիվության մասին, մասնավորապես` մանկահասակ երեխաների շրջանում։
«Հայտնաբերված հիվանդ վիճակում հաճախած մոտ 1800 երեխա տուն է ուղարկվել, նրանց տվյալները փոխանցվել է պոլիկլինիկական կազմակերպություններին՝ բժշկական հսկողություն սահմանելու համար։ Շաբաթվա ընթացքում արձանագրվել է սուր շնչառական վարակներով հիվանդացության շուրջ 4 հազար դեպք»,- ասաց Թորոսյանը։
Նա հատուկ շեշտեց` Հայաստանում սուր շնչառական վարակների համաճարակ չկա։
Այս պահին տարածված է A տեսակի H3 ենթատեսակի գրիպը։
«Այս հարուցչին բնակչությունը ծանոթ է 50-ական թվականներին, դրանից հետո հազվադեպ էր հանդիպում»,- ավելացրեց նա։
Լիանա Թորոսյանը չհերքեց, որ հանրապետության հիվանդանոցներում, հատկապես մանկական բաժանմունքներում կա գերբեռնվածություն։ Պատճառը, ըստ նրա, այն է, որ մարդիկ թեթև ախտանշանների դեպում անգամ շտապում են ոչ թե պոլիկլինիկա, այլ հիվանդանոց։
«Երեխաներին չենք մերժում, նրանց բժշկական օգնություն ցուցաբերվում է։ Հորդորում ենք առաջնահերթ դիմել պոլիկլինիկական ծառայություն, երբ այնտեղ որոշվի, որ ստացիոնար բուժում է պետք, արդեն կուղեգրեն հիվանդանոց։ Տարածքային կառավարման և զարգացման նախարարությանն առաջարկված է, որ շաբաթ և կիրակի օրերին աշխատանքներ կազմակերպվեն մինչև 10-ից 17-00-ն, առողջապահության նախարարությունն արդեն իր վրա վերցրել է այդ նախաձեռնությունը»,- ասաց մասնագետը։
Վերջերս Երևանում 8-ամյա երեխա մահացավ։ Սկսեցին լուրեր շրջանառվել, որ դա սուր շնչառական վարակների հետևանքով արձանագրված մահ էր։ Լիանա Թորոսյանը հերքեց տարածված լուրերը. շնչառական վարակ ու գրիպի հարուցիչներ նրա մոտ չեն հայտնաբերվել։ Այս պահին ընթանում է դատաբժշկական փորձաքննություն։
