ԵՐԵՎԱՆ, 22 նոյեմբերի — Sputnik. Հայաստանի տնտեսական զարգացման և ներդրումների նախարար Սուրեն Կարայանը և Ռուսաստանի առևտրի և արդյունաբերության նախարար Դենիս Մանտուրովը պայմանավորվել են արդյունաբերության ոլորտում համատեղ նախագծերի իրականացման «ճանապարհային քարտեզ» ստեղծելու մասին։
«Ճանապարհային քարտեզ» ստեղծելու մասին առաջարկով ռուս նախարարը հանդես է եկել Երևանում իր հայ գործընկերոջ հետ հանդիպման ժամանակ։
«Մեր երկրներից յուրաքանչյուրում այսօր զարգանում է ագրոարդյունաբերական հատվածը, սակայն այն արտադրանքը, որն արտադրում է տնտեսության այդ հատվածը, պետք է վերամշակել, պահպանել և հետագայում առաջ մղել սեփական երկրների և արտաքին շուկաներում։ Մենք պայմանավորվել ենք ընդգրկել բոլոր տեխնոլոգիական բուհերը, որոնք մեծ ներուժ ունեն այդ բնագավառում, այն ձեռնարկությունների գույքագրում անցկացնել, որոնք այսօր պատրաստ են արտադրել այդ ապրանքը, և այդպիսով ստեղծել ճանապարհային քարտեզ, միգուցե արտասահմանյան կապիտալի ներգրավմամբ», — նշել է Մանտուրովը։
Մանտուրովն ընդգծել է այնպիսի պայմանների ստեղծման կարևորությունը, որոնք թույլ կտան բիզնեսի ներկայացուցիչներին դուրս գալ երրորդ շուկաներ։
«Սուրեն Կարայանի հետ մենք ևս մեկ անգամ պետք է համակարգենք գործողությունները Մոսկվայում հաջորդ տարվա առաջին եռամսյակում և հուլիսին ամփոփենք աշխատանքի արդյունքները, այդ ամբողջը ամրագրենք ճանապարհային քարտեզում, որտեղ մենք ցանկանում ենք նշել այն ուղղությունների ցանկը, ձեռնարկությունների ցանկը, որոնց միջոցով կձևավորվեն նախագծերը»,- լրագրողներին պարզաբանեց ռուս նախարարը։
Նրա կարծիքով` փաստաթղթում պետք է արտացոլված լինեն ոչ միայն խոշոր նախագծերը, այլև միջին և մանր ձեռնարկությունները։ Կողմերը նաև պայմանավորվել են զարգացնել համագործակցությունը մեքենատեխնիկական կայանների ստեղծման ուղղությամբ Ռուսաստանի և Բելառուսի գյուղմեքենաշինական ձեռնարկությունների ներգրավմամբ։ Մանտուրովի խոսքով` կողմերը պայմանավորվել են նաև զարգացնել համագործակցությունը ռազմատեխնիկական ոլորտում։
