ԵՐԵՎԱՆ, 22 նոյեմբերի — Sputnik. Հայկական երկու ընկերություն դիմել է ՀՀ և ՌԴ պատկան կառույցներին՝ հայտնելով, որ Ռուսաստանում որոշ ընկերություններ փորձում են խոչընդոտել իրենց արտադրանքի մուտքը շուկա:
Կաթնամթերք արտադրող «Դուստր Մարիաննա» ընկերությունը դիմել է ՀՀ Տնտեսական մրցակցության պաշտպանության պետական հանձնաժողով՝ հայտնելով, որ ռուսական «Դեբր» և «Նագինսկի պիշչևոյ կոմբինատ» ընկերությունները հայտարարել են, որ իրենք են "Marianna" և "Marianne" ապրանքանշանների իրավատերը, ուստի հայկական ընկերությունը չի կարող այդ անվանումով իր արտադրանքն իրացնել ՌԴ-ում:
Ռուսական ընկերությունները պահանջել են տասնօրյա ժամկետում հանել հայկական ընկերության ապրանքը խանութներից և ոչնչացնել այն՝ հակառակ դեպքում սպառնալով դիմել դատարան:
ՏՄՊՊՀ-ն բողոքի հիման վրա ուսումնասիրություն է կատարել և պարզել, որ նշված ռուսական ընկերությունները կաթնամթերքի արտադրությամբ երբևէ չեն զբաղվել ու չեն զբաղվում, այլ արտադրում են միայն մայոնեզ և մայոնեզային սոուսներ:
Մինչ պատկան կառույցներին դիմելը «Դուստր Մարիաննան», ինչպես պատմեց ընկերության տնօրեն Տիգրան Վարդանյանը, փորձել է որոշ զիջումներով պայմանավորվել ռուսական ընկերության հետ, բայց անօգուտ:
«Մենք նույնիսկ ասել ենք, որ պատրաստ ենք հրաժարվել մայոնեզի արտահանումից և վաճառքից, միայն թե կարողանանք մեր կաթնամթերքը արտահանել Ռուսաստան»,- պատմեց Վարդանյանը՝ հավելելով, որ անգամ այս զիջումները որևէ արդյունք չեն տվել:
Ընկերության բողոքն ուսումնասիրող ՏՄՊՊՀ-ն ևս հանգել է այն եզրակացության, որ ռուսական «Դեբր» և «Նագինսկի պիշչևոյ կոմբինատ» ընկերություններն իրենց այդ քայլով փորձում են սահմանափակել ռուսական շուկայում հայկական ընկերության մրցակցությունը:
ՏՄՊՊՀ դիմած հաջորդ ընկերությունը՝ «Գրանդ Տոբակոն», նույնպես դժգոհում է, որ իրեն թույլ չեն տալիս հայկական արտադրության «Արարատ» ծխախոտը վաճառել ռուսական շուկայում: Այս դեպքում, սակայն, խոչընդոտողը ոչ թե ռուսական, այլ միջազգային «Ֆիլիպ Մորիս» ընկերությունն է:
Այս ընկերությունն արդեն իսկ դիմել է Մոսկվայի արբիտրաժային դատարան՝ ընդդեմ «Գրանդ Տոբակոյի»՝ նշելով, որ հայկական ընկերության արտադրած «Արարատ» ծխախոտը շփոթության աստիճանի նման է իրենց արտադրած «Մարլբորո» ապրանքանիշին: Ի դեպ, «Գրանդ Տոբակոյի» իրավաբանական բաժնի պետ Նիկոլայ Հակոբյանը նշեց, որ «Ֆիլիպ Մորիսին» հաջողվել է անգամ Մոսկվայի կենտրոնում գործող հայկական «Արարատ» խանութին համոզել հրաժարվել«Գրանդ Տոբակոյի» արտադրած «Արարատ» ծխախոտի վաճառքից:
«Եթե դու հայկական անուն կրող մի հսկա խանութի արգելում ես «Արարատ» ծխախոտի վաճառքը, ապա դժվար է պատկերացնել ավելի փոքր խանութների ու վաճառակետերի վարքագիծը: Բնականաբար, նրանք ևս մեր ապրանքն այսուհետ չեն ընդունի»,- ասաց Հակոբյանը:
Մոսկվայի արբիտրաժային դատարանում ՀՀ և ՌԴ հակամենաշնորհային մարմինները միասնական են հանդես գալիս ընդդեմ «Ֆիլիպ Մորիսի»: Իսկ մինչ դատարանը որոշում կկայացնի, երկու երկրների պետական կառույցներն արդեն իսկ սեփական ուսումնասիրությունն են կատարել և հուսով են, որ հայկական ծխախոտի մուտքը ռուսական շուկա չի սահմանափակվի:
«Մեր մասնակցությամբ ընթացող դատական գործերի 80 տոկոսը հաղթում է և միայն 20 տոկոսն է պարտվում»,- ասաց ՌԴ հակամենաշնորհային ծառայության փոխնախագահ Անդրեյ Կաշևարովը:
Այս դեպքում ռուսական պետական մարմինը պաշտպանում է հայ արտադրողի շահերը ռուսական շուկայում և հուսով է, որ դատական վեճը կլուծվի հօգուտ հայկական կողմի:
