ԵՐԵՎԱՆ, 21 նոյեմբերի — Sputnik. Դեկտեմբերի 1-25–ը և հունվարի 6-20-ը Սևանա լճում ձկնորսությունն արգելելու ու խիստ վերահսկողություն իրականացնելու վերաբերյալ այսօր Գեղարքունիքի մարզպետարանում կայացած աշխատանքային խորհրդակցության ժամանակ հայտարարեցին բնապահպանության նախարար Արծվիկ Մինասյանը, Գեղարքունիքի մարզպետ Ռաֆիկ Գրիգորյանը, փոխոստիկանապետ Սամվել Հովհաննիսյանը:
Երեք գերատեսչությունների ստորագրած համատեղ ծրագրով նախատեսվում է փակել դեպի լիճ տանող բոլոր ճանապարհները, Սևան ազգային պարկի տարածքից դուրս բերել բոլոր լողամիջոցներն ու ձկան որսի գործիքները և սահմանել հերթապահություն` կանխելով որսագողերի մուտքը:
Հատկապես խիստ հսկողություն է որոշվել սահմանել ափամերձ մի քանի գյուղերում, որոնց բնակչության շրջանում պետք է տարվեն նաև բացատրական աշխատանքներ:
«Համայնքի ղեկավարներին ուղղակի խնդրում եմ՝ լինենք ըմբռնող և մեր բնակիչներին բացատրենք, որ սա իսկապես այն ժամանակահատվածն է, որ անհրաժեշտ է, որպեսզի մենք պահենք, պահպանենք մեր հիմնական հարստությունը: Ձկների ձվադրության շրջանում սահմանված արգելքի իրականացումը Սևանա լճում բնական ճանապարհով վերարտադրությանը և պաշարների ավելացման հնարավորություն կտա, ինչն էլ իր հերթին կավելացնի ձկնորսների եկամուտը»,- ափամերձ գյուղերի ղեկավարների հետ հանդիպմանն ասաց Մինասյանը:
Գեղարքունիքի մի շարք գյուղերի ղեկավարները չթաքցրեցին, որ ձկնորսությունը, անգամ տարվա ամենավտանգավոր ու արգելված եղանակին, որոշ ընտանիքների ապրուստի գրեթե միակ միջոցն է:
Ծովագյուղի գյուղապետ Վահրամ Գևորգյանը նշեց, որ գյուղում վերջին տարիներին հնդկաձավարի արտադրություն է հիմնվել, որի շնորհիվ ծովագյուղցիները որոշ չափով դադարել են Սևանի բարիքներից կախում ունենալ: Ինչ վերաբերում է ձկնորսությանը, գյուղապետը վստահեցրեց, որ իր համագյուղացիները ոչ թե որսում են ձուկը, այլ միայն վերավաճառում այն` ավելի էժան գնով ձեռք բերելով ձկնորսներից:
Նորատուսի գյուղապետ Մուրադ Հարությունյանը Sputnik Արմենիայի հետ զրույցում անդրադարձավ համագյուղացի երկու երիտասարդ ձկնորսների հետ կապված ցավալի դեպքին` հավելելով, որ ամբողջ գյուղն արդեն շուրջ 1 ամիս փնտրում է ձկնորսությունից չվերադարձած տղային:
«Ամռանը հանգստի սեզոնին մարդիկ կարողանում են մի քիչ գումար վաստակել` վարձակալության, ծառայությունների ոլորտում: Բայց տարվա մնացած ամիսներին գյուղում հիմնական ապրուստի միջոցը անասնապահությունն է»,- ասաց գյուղապետը` չթաքցնելով, որ գյուղի տղամարդկանց մեծ մասն ընտանիքը պահելու համար արտագնա աշխատանքի է մեկնում:
Իսկ Ձորագյուղի գյուղապետ Լևիկ Գրիգորյանն էլ նշեց, որ իր ղեկավարած համայնքը լճից հեռու է, ուստի այստեղ ձկնորսությունը տարածված չէ: Փոխարենը «գյուղի տղամարդկանց մեծ մասն արտագնա աշխատանքով է տուն պահում»:
Իշխան և սիգ տեսակի ձկների որսից բացի` դեկտեմբերի 1-ից արգելվում է նաև խեցգետնի որսը: Այն այսօր ևս վտանգված է: Ինչպես նշեց բնապահպանության նախարարը, այսօր մայրաքաղաքի վաճառակետերում աննախադեպ փոքր չափերի խեցգետին է վաճառվում, ինչը նշանակում է, որ այս կենդանատեսակն էլ առաջիկայում կարող է վերացման վտանգի տակ հայտնվել:
Արծվիկ Մինասյանը վստահեցրեց, որ մեկամսյա արգելքի նպատակը գյուղացուն պատժելը չէ, այլ միայն Սևանա լճի կենդանական աշխարհի վերարտադրությունն ապահովելը, ինչը հետագայում հնարավորություն կտա լճից էլ ավելի մեծ բարիքներ ստանալ:
