ԵՐԵՎԱՆ, 21 նոյեմբերի — Sputnik. ՀՀ բնապահպանության նախարար Արծվիկ Մինասյանը հրաման է ստորագրել «Սևանա լճում ձկան բնական վերարտադրության ժամանակահատվածում իրականացվող միջոցառումների մասին», որի համաձայն` 2016 թվականի նոյեմբերի 25-ից մինչև 2017 թվականի հունվարի 5-ը ժամանակավորապես դադարեցվում է Սևանա լճում և այնտեղ թափվող գետերում ձկան և խեցգետնի որսը:
«Որսը ժամանակավորապես դադարեցվում է` իշխան և սիգ ձկնատեսակների ձվադրման ժամանակահատվածում ձկների բնական վերարտադրությունն ապահովելու նպատակով»,- նշված է հրամանագրում։
«Սևան ազգային պարկ» ՊՈԱԿ-ի տնօրենի ժամանակավոր պաշտոնակատարը պետք է մինչև նոյեմբերի 23-ն ապահովի Սևանա լճից ձկնորսության և խեցգետնորսության համար նախատեսված բոլոր որսագործիքների, լողամիջոցների, ինչպես նաև ժամանակավոր կացարանների դուրս բերումը,
շրջիկ հսկողություն իրականացնի Սևանա լճի առափնյա տարածքներում և գետաբերաններում։
Ըստ նախարարի հրամանագրի` ստուգայցեր պետք է կազմակերպվեն Սևանա լճի վրա` համագործակցելով Հայաստանի Հանրապետության բնապահպանության նախարարության աշխատակազմի բնապահպանական պետական տեսչության, Հայաստանի Հանրապետության Գեղարքունիքի մարզային ոստիկանության, Հայաստանի Հանրապետության Գեղարքունիքի մարզպետարանի և համայնքների ղեկավարների հետ:
