ԵՐԵՎԱՆ, 21 նոյեմբերի — Sputnik. Միջազգային ֆինանսական շուկան առաջիկայում լուրջ փոփոխությունների է ենթարկվելու, կարծում է Խաչատուր Քոքոբելյանը` հետևելով ԱՄՆ նորընտիր նախագահ Դոնալդ Թրամփի` ֆինանսական շուկայի վերաբերյալ արած հայտարարություններին:
«ԱՄՆ նորընտիր նախագահը, դեռևս պաշտոնը չստանձնած, արդեն հայտարարել էր, թե ով է ղեկավարելու ԱՄՆ ֆինանսական կառույցը և ինչ փոփոխություններ է կատարելու: Նախկինում գործող խաղի կանոնների զգալի մասի փոփոխություններ են լինելու, որոնց արդյունքում լուրջ փոփոխությունների է ենթարկվելու միջազգային ֆինանսական շուկան»,- կարծում է Քոքոբելյանը:
Նա նաև նշել է, որ այդ փոփոխություններն անսպասելի չէին, քանի որ արդեն շուրջ 3 տարի միջազգային ասպարեզում դրանց մասին խոսվում է:
«Կա որոշակի լճացում: Աշխարհի զարգացած երկրներում կա ֆինանսի ավելցուկ, այսինքն` բանկերում կա կուտակված գումար: Իսկ զարգացող և հատկապես թույլ զարգացած երկրներում կա խիստ դեֆիցիտ: Բնական է, որ դա ձեռնտու չէ մեծ ֆինանսական հոսքերի տիրապետող մարդկանց, որովհետև այս լճացումն իրենց շահութաբերությունն իջեցնում է»,- ասել է պատգամավորը` կարծիք հայտնելով, որ հենց այս պատճառով է ֆինանսական շուկայում առաջիկայում լուրջ փոփոխություններ կանխատեսում:
Բայց Հայաստանն ու հայկական դրամը միջազգային այս փոփոխություններից, Քոքոբելյանի համոզմամբ, չեն տուժի: Պատգամավորը հիշեցնում է, որ Հայաստանում դրամի արժևորումն ու արժեզրկումը ոչ թե միջազգային, այլ տեղական վայրիվերումների հետևանք են:
«Ես կարծել եմ և կարծում եմ, որ դրամը արհեստական, գուցե նաև քաղաքական որոշումների արդյունքում է արժեզրկվում, բայց լավ է, որ մեր ԿԲ-ն դրամն ամեն դեպքում փորձում է կայուն պահել: Ես չեմ կիսում այն տեսակետը, որ երբեմն հնչում է, թե դրամը պետք է բնական վիճակում թողնել: Ես չեմ կիսում այն տեսակետը, թե դրամը պետք է թողնել մինչև վերջ արժեզրկվի: Դա նշանակում է ունեզրկել աշխատավարձ ստացող մարդկանց»,- համոզված է պատգամավորը:
