ԵՐԵՎԱՆ, 19 նոյեմբերի — Sputnik, Նելլի Դանիելյան. Հայաստանում այսօր բազմաթիվ հիմնադրամներ են գործում, որոնց հիմնական առաքելությունը մարտական գործողությունների ժամանակ զոհված կամ վիրավոր զինծառայողներին ու նրանց ընտանիքներին աջակցելն է: Նման հիմնադրամների հստակ թիվ դժվարանում են նշել անգամ Պաշտպանության նախարարությունում:
«Մեկը չէ, երկուսը չեն, հստակ դժվարանում են նշել,- պատասխանելով Sputnik Արմենիայի հարցին՝ ասաց ՀՀ ՊՆ մամուլի քարտուղար Արծրուն Հովհաննիսյանը:- Մեկ տասնյակ երևի, որ ես գիտեմ, որովհետև կարող են լինել, որ մենք չիմանանք: Հիմնադրամներ կան, որ նույնիսկ տվյալներ չեն ուզում մեզանից. իրենք ունեն իրենց տվյալները: Բայց հիմնադրամների գերակշիռ մասը մեզանից տվյալներ է ուզում՝ հասցեներ, հեռախոսահամարներ, անուններ, և աշխատում են ուղիղ: Ուղիղ հիմնադրամներ շատ կան և՛ Հայաստանում, և՛ սփյուռքում»:
Իսկ թե որքան գումար է տարեկան շրջանառվում այս հիմնադրամներում, և դրանից որքան է բաժին հասնում զինծառայողների կարիքավոր ընտանիքներին, նման տեղեկություններ անգամ ՊՆ-ն չունի: Արծրուն Հովհաննիսյանը խոստովանեց, որ նման հաշվարկ անելը հեշտ չէ:
Պաշտպանության նախարարության վերլուծությունները վկայում են, որ 2005-ից մինչև 2016թ-ը մարտական գործողությունների ժամանակ զոհված և հաշմանդամ դարձած զինծառայողների ընտանիքների 30-35%-ը խիստ կարիքավոր է, 20-25%-ը՝ կարիքավոր: Այս տվյալները վկայում են, որ իրենց կյանքն ու առողջությունը հայրենիքին զոհաբերած զինծառայողների ընտանիքների կեսից ավելին այսօր պետական աջակցության կարիք ունի:
«Միջինը շաբաթական մենք մոտավորապես 30 ընտանիքի ենք օգնում: Իհարկե, շաբաթներ են եղել, երբ 100 ընտանիքի հետ ենք աշխատել, բայց չեմ ուզում մաքսիմալ թիվ նշել: Միջինացված թվերով՝ շաբաթը 30-40 ընտանիք որոշակի աջակցություն է ստանում՝ բժշկական, ուսման վարձի, խնդիր, ձմեռվա վառելիքի հետ կապված»,- ասաց Արծրուն Հովհաննիսյանը:
Եթե հաշվարկենք, որ տարին շուրջ 50 շաբաթ ունի, ապա կարելի է եզրակացնել, որ տարեկան շուրջ 200 000 ընտանիք որոշակի աջակցություն է ստանում միայն ՊՆ-ի նախաձեռնությամբ ու մասնակցությամբ: Մյուս հիմնադրամների աջակցություններն ու ծախսերը, այդ թվում նաև 2002 թ-ին պետության կողմից ստեղծված «Մարտիկ» հիմնադրամինը, հասարակության համար անհայտ են մնում:
Ի դեպ, Աժ-ում այս նպատակով ստեղծվող նոր հիմնադրամի շուրջ քննարկումներում հիշատակվեց նաև այս հիմնադրամը: Ի պատասխան պատգամավոր Նաիրա Զոհրաբյանի հարցի, պաշտպանության նախարարը խոստովանեց, որ հիմնադրամի գումարներից ինքն էլ տեղյակ չէ:
