Լաուրա Սարգսյան, Sputnik.
Հայաստանի ավիաուսումնական կենտրոնի միջանցքներում լուռ է, ու բոլորովին էլ զարմանալի չէ, որովհետև լսարաններում պարապմունքներ են ընթանում: Ապագա օդաչուները, օդային երթևեկության սպասարկման կարգավարները, ավիատեխնիկները, բորտուղեկցորդները, ավիացիոն անվտանգության ծառայությունների աշխատակիցները, ուղևորների և ուղեբեռների փոխադրումների հաշվառման ծառայության աշխատակիցներն ու ավիատոմսեր իրացնող գործակալները մեծ ուշադրությամբ են լսում դասախոսությունները:
Միջանցքում աշխուժություն է նկատվում, երբ հնչում է զանգը: Կարճ ժամանակ անց կրկին լռություն է տիրում:
«Քաղավիացիայում այլ կերպ լինել չի կարող. ցանկացած սխալ շարժում կամ թերացում կարող է անցանկալի հետևանքների հանգեցնել: Այստեղ միշտ պետք է զգոն լինել», — Sputnik Արմենիայի թղթակցի հետ զրույցում ասաց ավիակենտրոնի սովորողներից մեկը՝ Անահիտ Ղազարյանը:
Անահիտը քաղավիացիայի հետ մանկուց է կապված. հայրն ու եղբայրը օդաչուներ են, իսկ մայրը՝ ավիացիոն անգլերենի մասնագետ: Անահիտը համարում է, որ իր ընտրած աշխատանքը (օդանավի կարգավար) ամենակարևորն է ավիացիայի ոլորտում: Ուսումնական կենտրոնը 67 ուսանող ունի, որոնցից 15-ն աղջիկներ են: Այնպես որ ավիակենտրոնում կարծում են, որ շուտով Հայաստանը կին օդաչու է ունենալու:
«Միջազգային պրակտիկայում կին օդաչուներ շատ կան, իսկ Հայաստանի համար սա հեղափոխություն է լինելու: Մեր ուսանողուհին լավ օդաչու դառնալու բոլոր նախադրյալներն ունի», — վստահեցնում է անգլերենի դասախոս Լուիզա Իսկույանը:
Օդաչուի մասնագիտություն ընտրածների շարքում միայն մեկն է աղջիկ, մյուսները մինչև 28 տարեկան երիտասարդներ են: Օդաչուների սենյակում ապագա գիտակներին ցամաքի վրա մարզվելու համար նախատեսված հատուկ մարզասարք է դրված: Իսկույանը բարձր է գնահատում իր ուսանողների անգլերենի իմացությունը և կարծում է, որ այն ոչ միայն համապատասխանում է միջազգային չափորոշիչներին, այլև օգնում է հայ օդաչուներին, կարգավարներին ու մյուս մասնագետներին կատարելագործել հմտությունները տարբեր երկրներում:
Օդաչուի կոչումն ընտրած և ավիակենտրոնն ավարտած ուսանողներից շատերն այսօր աշխատում են ինչպես Հայաստանի, այնպես էլ այլ երկրների քաղավիացիայում:
Ավիակենտրոնի բոլոր ծրագրերը հաստատում է Հայաստանի գիտության և կրթության նախարարությունը, և դրանք համապատասխանում են միջազգային չափանիշներին: Յուրաքանչյուր մասնագիտության գծով ուսումը տևում է երկուսուկես տարի:
«Մենք ավիամասնագետներ ենք պատրաստում հետևյալ ուղղություններով` օդաչուներ, օդանավի կարգավարներ, փոխադրողներ և ավիատեխնիկներ: Այստեղ նրանք նախնական բազային կրթություն են ստանում», — ասաց ավիակենտրոնի ուսումնական մասի վարիչ Հասմիկ Լևոնյանը:
Այստեղ են նախնական պատրաստություն անցնում նաև հայրենական բորտուղեկցորդները, բարձրացնում իրենց որակավորումը: Ուսուցման պարտադիր ուղղություններն են` առավել վտանգավոր իրերի վերաբերյալ գիտելիքների խորացում, ավիացիոն անվտանգության դասընթացներ, մարդկային գործոն և այլն:
Հայաստանի քաղավիացիան հիմնադրվել է 1933 թվականին: 1962 թվականին ստեղծվել է ուսումնամարզական էսկադրիլիան, որը 1976 թվականին վերափոխվել է ուսումնամարզական ջոկատի: Ավիաուսումնական կենտրոնը ստեղծվել է 1993թ.`Ուսումնավարժական ջոկատի հիմքի վրա: Արցախյան հերոսամարտի տարիներին ՀՀ պաշտպանության նախարարության պատվերով կենտրոնը պատրաստել է 39 օդաչու և 44 ավիատեխնիկ: 1994-97թ.-ին ՀՀ քաղաքացիական ավիացիայի պատմության մեջ առաջին անգամ կենտրոնը պատրաստել է 9 օդաչու, նրանցից երկուսն արդեն Ա-320 տիպի օդանավի օդաչուներ են:
