ԵՐԵՎԱՆ, 19 նոյեմբերի — Sputnik, Անի Լիպարիտյան. Օգտատերերը բավական սուր և հումորով են արձագանքել համացանցում հրապարակված այն լուսանկարին, որի մի կողմում պատկերված է Ճապոնիայի Ֆուկուոկա քաղաքում փլված ճանապարհը, մյուս կողմում` այդ նույն ճանապարհի` երկու օրում վերականգնված տարբերակը:
Վլադ Ռակոչի (VladRákoczi) անունով օգտատերը գրել է, թե ինչպես դա տեղի կունենար Ռումինիայում:
- «Ռումինիայում դա երկու տարի կտևեր: Երեք իրավաբանական կազմակերպություն կներգրավեին, ճանապարհների կառուցման և վերականգնման չորս տարբեր կազմակերպություններ, միայն նրա համար, որպեսզի պարզեին, թե ով է կատարվածի մեղավորը: Առաջիկա 3-4 տարիներին էլ ճանապարհը չէին վերականգնի, քանի որ գալիք ընտրությունների ժամանակ այս հարցը թեկնածուների համար հրաշալի խաղաքարտ կդառնար և կշահարկեին իրենց նախընտրական քարոզարշավում»,- գրել է նա:
Ռումինացու խոսքով` ճանապարհը կվերականգնվեր քաղաքապետի ընտրությունից հետո միայն:
- Մեկ այլ օգտատեր` Գրեգորի Գաթսոսը (GregoryGatsos), բավական սուր է արձագանքել. «Եթե դեպքը լիներ Հունաստանում, փոսում հնագույն ավերակներ կհայտնաբերեին և կվերածեին զբոսաշրջիկների համար տեսարժան վայրի»:
Իսկ Ֆրեդերիկ Քեմպֆը (FrédéricKempf) շատ ինքնատիպ լուծում է առաջարկել:
- «Ես դա մեկ ժամում կանեի… ֆոտոշոփի օգնությամբ», — կատակել է նա:
Բուդապեշտի բնակչի արձագանքը.
- «Հունգարիայում դա մի հավերժություն կտևեր: Վերականգնման համար նախատեսված գումարները նույն պահին կգողանային: Կմեղադրեին նախորդ կառավարությանը, փախստականներին կամ Գոդզիլային: Որոշ ժամանակ անց հուսալքված քաղաքացիներն իրենց միջոցներով կփորձեին վերականգնել ճանապարհը, ու այդ ժամանակ նրանց կձերբակալեին հասարակական ունեցվածքը փչացնելու համար: Պատմության ավարտ», — գրում է Բաքսկայի Չեգոն (BácskaiCsegő):
Ալեքսանդր Եսմինովը նույնպես զուրկ չէ հումորի զգացումից.
- «Ֆիլիպիններում դա 10 տարի կտևեր, 18 քննարկում Սենատում, Գերագույն դատարանի 1 որոշում, 25 բողոք, 16 մարդու մահվան պատճառ և շինարարություն սկսելու համար կանչված 32 կապալառու»:
Իհարկե, սրանք Facebook-ի օգտատերերի բոլոր գրառումները չեն. ավելի քան 2000 մեկնաբանություն կա այն մասին, թե որ երկրում ինչպես և որքան ժամանակում կվերականգնեին փլված ճանապարհը:
