ԵՐԵՎԱՆ, 16 նոյեմբերի — Sputnik, Լաուրա Սարգսյան. «Արմենիա» ավիաընկերությունը փոփոխություններ է կատարել սակագնային քաղաքականության մեջ. այսուհետև 49 եվրո արժողությամբ տոմսը կարելի է ձեռք բերել ոչ թե 60, այլ 30 օրվա ընթացքում, Sputnik Արմենիայի թղթակցի հետ զրույցում ասաց «Արմենիա» ավիաընկերության տնօրենի` հասարակայնության հետ կապերի գծով տեղակալ Գևորգ Խաչատրյանը։
«Եթե ուղևորը տոմսը ձեռք է բերում Երևանից մեկնելուց մեկ ամիս առաջ, ապա տոմսի արժեքը կկազմի 49 եվրո` առանց «Զվարթնոց» օդանավակայանի հարկերի։ Մեկնելուց առաջ յոթ օրվա ընթացքում տոմսի գինը կկազմի 69 եվրո», — ասաց նա։
Նրա խոսքով` թռիչքի օրը կամ դրանից մի քանի օր առաջ տոմսի գինը կկազմի 89-100 եվրո` առանց հարկերի։ Ընկերությունը գործարկել է armeniafly.com վեբ-կայքը, որի միջոցով հնարավոր կլինի ամրագրել տոմսերը։
Խաչատրյանի խոսքով` յուրաքանչյուր ոք կարող է գրանցվել կայքում և տոմս ձեռք գնել իրեն հարմար ուղղությամբ։
«Մեզ մոտ 4 սակագին է գործում «բեյսիք», «սմարթ», «ֆլեքսի» և «սուպեր», որոնք տարբերվում են ուղևորներին առաջարկվող ծառայություններով», — ասաց նա։
«Ֆլեքսի» սակագնում ներառված է տոմսի վերադարձը կամ փոխանակումը, 10 կգ ձեռքի ուղեբեռը։ «Էկոնոմը» և «սմարթը» գրեթե ամբողջական փաթեթներ են, որոնցում ներառված է 25 կգ ուղեբեռ և 10 կգ ձեռքի ուղեբեռ։ «Սուպեր» սակագինն ամբողջական փաթեթ է` ինքնաթիռում ցանկալի տեղն անվճար ընտրելու հնարավորությամբ։
Ավիաընկերությունը ևս մեկ նորույթ է առաջարկում` ազատ տեղերի առկայության դեպքում էկոնոմ դասի տոմսը փոխարինել բիզնես դասի տոմսով, 50 եվրո հավելավճարով։
«Արմենիա» ավիապարկն ունի երեք ինքնաթիռ՝ Boeing 737-500, Boeing 737-700 և Bombardier CRJ200, ավելի քան 60 աշխատակից՝ 16 ուղեկցորդ, հինգ օդաչու, գրասենյակային անձնակազմի 15 ներկայացուցիչ և այլն:
Ավիաընկերության հիմնադիրներն են Աշոտ Թորոսյանը (51 տոկոս բաժնետոմսեր), Թամազ Գաիաշվիլին (24 տոկոս) և Ռոբերտ Հովհաննիսյանը (25 տոկոս):
