Իրավունք. «Ինչու՞ է Աթեշյանը ժամանել Հայաստան»
Թուրքիայի նախագահ Ռեեջեփ Թայիփ Էրդողանին գրած աղմկահարույց նամակի պատճառով Հայաստանի ու Սփյուռքի հասարակության քննադատության թիրախում հայտնված Պոլսո հայոց պատրիարքության ընդհանուր փոխանորդ, արքեպիսկոպոս Արամ Աթեշյանը նախօրեին առավոտյան ժամանել է Երևան։
«Ըստ տեղեկությունների`Աթեշյանը Հայաստան է այցելել Մայր աթոռի հրավերով։ Թե ինչ նպատակով, Մայր աթոռի լրատվական բաժնից ոչինչ չհայտնեցին` նկատելով միայն, որ հավելյալ տեղեկություններ կտրամադրեն առաջիկայում»,-գրում է թերթը։
Ժամանակ. ՀՀԿ փոխնախագահ
Թերթը գրում է, որ վարչապետ Կարեն Կարապետյանը նոյեմբերի 26-ին կայանալիք ՀՀԿ համագումարի ժամանակ կընտրվի ՀՀԿ փոխնախագահ` Ռազմիկ Զոհրաբյանի փոխարեն։
«Այլ առանցքային փոփոխություններ համագումարի ժամանակ, ըստ էության, չեն լինելու։ Մյուս փոխնախագահները պահպանելու են իրենց դիրքերը կուսակցությունում։ Ի դեպ, ՀՀԿ խոսնակ Էդուարդ Շարմազանովը երեկ ՀՀԿ ԳՄ նիստից հետո, պատասխանելով փոփոխությունների վերաբերյալ հարցին, ասել էր. «Ես միայն կարող եմ ասել, որ կուսակցությունը շարունակելու է ղեկավարել ՀՀ նախաագահ Սերժ Սարգսյանը։ Մնացածը կիմանաք համագումարի օրը»,,-գրում է թերթը։
Իսկ Հովիկ Աբրահամյանը, թերթի տեղեկություններով, շարունակում է մնալ խորը անորոշության մեջ։ Այն, թե ինչով կզբաղվի Հովիկ Աբրահամյանը, Սերժ Սարգսյանի հետ վերջին հանդիպումից հետո որոշվել է վճռել ընթացիկ ամսվա նոյեմբերի 26-ին կայանալիք ՀՀԿ համագումարից հետո։
Հայկական ժամանակ. «Նվեր Լուկաշենկոյին»
Թերթը գրում է, որ վարչապետ Կարեն Կարապետյանը շարունակում է ճոխ գնումներ անել։ Կառավարությունը հոկտեմբերի 25-ին 864 հազար դրամով «Մանգասար» ընկերությունից գնել է մի նկար։ Պաշտոնական փաստաթղթերի համաձայն` նկարի հեղինակը Ցոլակ Ազիզյանն է։
«Կառավարությունն այդ նկարը գնել է Եվրասիական միջկառավարական խորհրդի և ԱՊՀ կառավարությունների խորհրդի նիստին ՀՀ-ի մասնակցելու առթիվ։ Հիշեցնենք, որ հոկտեմբերի 27-28-ը վարչապետ Կարեն Կարապետյանն աշխատանքային այցով մեկնել էր Մինսկ` մասնակցելու վերը նշված նիստին։ Իսկ այս նկարը նա գնել է հավանաբար հյուրընկալող երկրի` Բելառուսի վարչապետին կամ նախագահ Լուկաշենկոյին նվիրելու համար։ Ի դեպ, վարչապետն իր հետ նաև ինը հատ «Նաիրի» և «Դվին» բարձրակարգ կոնյակ է տարել` հավանաբար ԵՏՄ անդամ երկրների իր գործընկերներին նվիրելու համար»,-գրում է թերթը։
Առավոտ. «Թրամփը կաշխատի աշխուժացնել հայ-ամերիկյան հարաբերությունները»
Թերթն անդրադարձել է Թրամփի նախագահության օրոք հայ-ամերիկյան հարաբերությունների խորացմանը։
«Թրամփը կաշխատի աշխուժացնել հայ-ամերիկյան հարաբերությունները, եթե պաշտոնական Երևանը չունենա արտաքին և ներքին սահմանափակումներ։ Հայ-ամերիկյան հարաբերությունների ընդհանուր դինամիկան մեծապես կախված կլինի նաև այն հանգամանքից, թե ով է լինելու նոր պետքարտուղարը և ընդհանրապես` նրա ողջ թիմը։ Եթե պետքարտուղար լինի Նյութ Գինգրիչը, ապա, օրինակ, նրա վերաբերմունքը ցեղասպանության ճանաչմանը շատ բացասական է եղել, մինչդեռ փոխնախագահ Մայքլ Պենսը կոնգրեսական եղած ժամանակ բազմաթիվ անգամներ հայտնել է իր աջակցությունը ցեղասպանության ճանաչմանը»,-թերթի հետ զրույցում ասել է փորձագետ Գևորգ Մելիքյանը։
