ԵՐԵՎԱՆ, 13 նոյեմբերի — Sputnik. ՀՀ պետական պարտքն այս տարվա հոկտեմբերի 1-ի դրությամբ կազմել է 5 մլրդ 607 մլն ԱՄՆ դոլար կամ 2 տրիլիոն 665 մլրդ դրամ, որից արտաքին պարտքը ՝ 4,045 մլրդ դոլար, ներքին պարտքը՝ 1,063 մլրդ դոլար: Այդ մասին պետական պարտքի թեմայով հրավիրած սեմինար-քննարկման ժամանակ ասաց ՀՀ ֆինանսների նախարարության պետական պարտքի կառավարման վարչության պետ Արշալույս Մարգարյանը:
Նրա ներկայացմամբ՝ այս տարեվերջին պարտք-ՀՆԱ հարաբերակցությունը կգերազանցի 50 տոկոսի սահմանը և, եթե կառավարության պարտքը գերազանցում է Հայաստանի նախորդ տարվա ՀՆԱ-ի 50 տոկոսի շեմը, ապա հաջորդ տարվա բյուջեի դեֆիցիտը չպետք է գերազանցի երկրի ՀՆԱ-ի վերջին երեք տարիների ծավալների միջին ցուցանիշի 3 տոկոսը:
«2017-2019 տարիներին յուրաքանչյուր տարվա վերջին ՀՀ կառավարության պարտք-ՀՆԱ ցուցանիշը կանխատեսվում է 50 տոկոսից ավելի: Հետևաբար, բյուջեով նախատեսված տարեկան դեֆիցիտը չպետք է լինի 3 տոկոսից ավելի»,- ասաց վարչության պետը:
Նրա խոսքով՝ ՀՀ կառավարության պարտքը միջնաժամկետում (2019 թ.) կհասնի մինչև ՀՆԱ-ի 52 տոկոս, սակայն երկարաժամկետ հատվածում ծրագրավորվում է նվազեցում մինչև մինչճգնաժամային մակարդակի:
Ներքին պարտքն էլ կաճի և կհասնի ՀՆԱ-ի 9.7 տոկոսը: Ըստ Արշալույս Մարգարյանի՝ ծրագրվում է ներքին պարտքի կշռի ավելացում կառավարության պարտքի պարտֆելում, ինչպես նաև ծրագրավորվում է հարկային եկամուտների ավելացում շուրջ 0,9 տոկոսային կետ ՀՆԱ-ի նկատմամբ և ծախսերի կրճատում շուրջ 3.7 տոկոսային կետ ՀՆԱ-ի նկատմամբ:
Խոսելով պարտքի ձևավորման մասին՝ Արշալույս Մարգարյանն ասաց, որ խորհրդային տարիներին որևէ մեկը չգիտեր, թե ինչ է պետական պարտքը, պետական պարտքի մասով որևէ դիպլոմային աշխատանք կամ հետազոտություն անելու համար պետք է Մոսկվա կամ Սանկտ Պետերբուրգ հասնեին:
«Պետական պարտքի կառավարումը Հայաստանում սկսվել է սպիտակ թղթից, այնուհետև 90-ականներին պարենային նվազագույն կարիքներն ապահովելու համար արտաքին աղբյուրներից սկսեցին վարկեր ներգրավել»,- նշեց Արշալույս Մարգարյանը:
Ըստ նրա, խորհրդային միության փլուզումից հետո չկար որևէ մեկը, որը պետական պարտքի կամ դրա կառավարման վերաբերյալ որևէ գիտելիք ունենար:
