ԵՐԵՎԱՆ, 12 նոյեմբերի — Sputnik. Նոյեմբերի 16-ից աֆրիկյան երկրներից եկող տաք օդի ներհոսքը Հայաստան կնվազի, որին կհաջորդի արևմուտքից համեմատաբար սառը օդային հոսանքների ներթափանցումը: Այս մասին Ֆեյսբուքի իր էջում գրել է ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը։
Սուրենյանը զգուշացրել է, որ նոյեմբերի 16-ից հետո օդի ջերմաստիճանը կսկսի նվազել:
Սակայն մի քանի օր դեռ Հայաստանի բնակիչները կվայելեն տաք եղանակը։ ԱԻՆ կանխատեսմամբ` Հանրապետության տարածքում նոյեմբերի 12-15-ը սպասվում է առանց տեղումների եղանակ, 16-ի երեկոյան ժամերին հյուսիսային շրջաններում սպասվում են տեղումներ:
Քամին կլինի հարավ-արևմտյան՝ 3-8 մ/վ արագությամբ:
Օդի ջերմաստիճանը նոյեմբերի 14-16-ն աստիճանաբար կնվազի 4-5 աստիճանով:
Երևանում նոյեմբերի 12-16-ը սպասվում է առանց տեղումների եղանակ: Այսօր մայրաքաղաքում ցերեկը կլինի 18-20 աստիճան տաքություն։
