ԵՐԵՎԱՆ, 11 նոյեմբերի — Sputnik, Անի Լիպարիտյան. Զաքյան 2Բ հասցեում գտնվող շենքը հայտնվել է Sputnik Արմենիայի ուշադրության կենտրոնում:
Պատճառը շենքի պատին խորհրդային գիտնական, հնագետ, արևելագետ Բորիս Պիոտրովսկու հուշատախտակի տեղադրումն է. գիտնականն այդ տանն ապրել է 1940-1950 թթ-ին:
Այդ տանը շուրջ տասը տարի ապրած լրագրող և հրապարակախոս Արմեն Խանբաբյանը Sputnik Արմենիային մի քանի հետաքրքիր փաստ պատմեց:
«Այդ շենքում բնակարանների մեծ մասը պատկանել է նախարարների խորհրդի գործերի վարչությանը, որովհետև շենքը կառուցվել է քաղաքի կենտրոնում: Բնական է, որ այստեղ բնակարաններ են ստացել կուսակցական ապարատի, հայկական ԽՍՀ մինիստրների խորհրդի, տարբեր գերատեսչությունների աշխատողներ»,- պատմեց Խանբաբյանը:
Նա հիշում է, որ այս շենքում բնակվել են ավագ սերնդի մտավորականության ներկայացուցիչներ՝ ինժեներներ, բժիշկներ, արվեստի գործիչներ, գիտնականներ: Սակայն տունը հայտնի էր ոչ միայն բնակիչներով:
«Բանն այն է, որ առաջին հարկում գտնվել է Առաջին դեղատունը: Եվ երբ ընկերներիդ հետ պետք է պայմանավորվեիր ու հանդիպեիր, ապա կողմնորոշվում էիր Առաջին դեղատնով», —
պատմեց լրագրողը:
Դա քաղաքի առաջատար դեղատունն էր: Խանբաբյանի խոսքով՝ այստեղ կարելի էր այնպիսի դեղեր գտնել, որոնք ոչ մի տեղ չէին վաճառվում:
Պատմական դեղատան շենքում բնակարաններ են ստացել նաև այդ վայրերի հնաբնակները, որոնք մոտակայքում սեփական տներ են ունեցել: Քաղաքի նոր կենտրոնը կառուցելու ժամանակ շատ հին սեփական տներ քանդվել են, իսկ տերերը բնակարան են ստացել հենց այդ շենքում:
Խանբաբյանի խոսքով՝ այդ փողոցում ներկայացված է եղել ժամանակի երևանյան բազմաշերտ հասարակությունը՝ ակադեմիկոս Պիոտրովսկուց մինչև տաքսու վարորդ և գործարանի բանվոր: Նրա կարծիքով՝ հենց դրանով էր հետաքրքիր շենքը:
«Այստեղ բնիկ երևանցիներ են ապրել: Չնայած շենքի բնակիչների սոցիալական կազմի բազմազանությանը՝ նրանք բոլորն իսկապես կիրթ մարդիկ էին»,- ասաց Խանբաբյանը:
Ինչպես նշեց լրագրողը, այդ տարիներին նշանակություն չուներ՝ մարդն ակադեմիկոս է, տաքսիստ, թե գիտնական, ինչպես Պիոտրովսկին: Այն ժամանակ սոցիալական և քաղաքացիական միասնություն կար:
Նոր սերնդի համար այդ շենքն արդեն կապված կլինի ակադեմիկոս Պիոտրովկսու անվան հետ, քանի որ վերջերս շենքի պատին տեղադրվել է նրա դիմաքանդակը:
Այժմ այն ծածկված է սպիտակ կտորով: Հավանաբար առաջիկայում տեղի կունենա դիմաքանդակի պաշտոնական բացումը:
