ԵՐԵՎԱՆ, 11 նոյեմբերի — Sputnik. «Պոբեդա» ավիաընկերությունը դեկտեմբերի 15-ից չվերթեր կիրականացնի դեպի Հայաստանի մեծությամբ երկրորդ քաղաք` Գյումրի»,- լրագրողներին ասաց ավիաընկերության գլխավոր տնօրեն Անդրեյ Կալմիկովը։
«Նոյեմբերի 21-ից կիրականցնենք ավիատոմսերի վաճառք, նվազագույն արժեքը կկազմի 999 ռուբլի կամ 16 դոլար։ Թռիչքները կիրականացվեն դեկտեմբերի 15-ից, շաբաթական երեք անգամ` երեքշաբթի, հինգշաբթի և կիրակի օրերին», — նշեց Կալմիկովը։
Նրա խոսքով, ուղևորները Երևան հասնելու խնդիր չեն ունենա։
«Մեր ուղևորների համար մենք կազմակերպում ենք հատուկ հարմարավետ տրանսֆեր Գյումրու օդանավակայանից Երևան, Fly & Bus ծառայության միջոցով»,- հավելեց նա։
Մինչ այդ «Պոբեդան» Մոսկվայից Գյումրի թռիչքներ կատարելու թույլտվություն էր ստացել։ Թույլտվությունը տրվել է շաբաթական յոթ անգամ թռիչքներ կատարելու համար։ Լոուքոսթերը նաև նախատեսել էր թռիչքներ կատարել Դոնի Ռոստովից Երևան։ Սակայն հետո որոշել է հրաժարվել դեպի Երևան թռիչքներ կատարելուց «Զվարթնոց» օդանավակայանում սպասարկման բարձր գների պատճառով։
«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2015 թվականի արդյունքներով` ավիաընկերությունը սպասարկել է 3.09 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 7-րդ տեղն է զբաղեցրել:
