ԵՐԵՎԱՆ, 11 նոյեմբերի — Sputnik. «Հայաստան» համահայկական հիմնադրամի հոգաբարձուների խորհրդի և տեղական մարմինների 25-րդ համատեղ նիստի որոշմամբ 2016 թ.-ի նոյեմբերի 24-ին Հիմնադրամի գործադիր վարչությունը կկազմակերպի ազգային նվիրատվության հեռուստամարաթոն, հայտնում են «Հայաստան» հիմնադրամից։
Մարաթոնի արդյունքում հավաքագրված գումարները կնպատակաուղղվեն Արցախի տուժած բնակավայրերի վերականգնմանը, խաղաղ բնակչության անվտանգությանն ու պաշտպանությանն ուղղված միջոցառումներին, ինչպես նաև Արցախի բազմազավակ ընտանիքների համար առանձնատներ կառուցելուն: Զուգահեռաբար կշարունակվեն նպատակային ծրագրերը:
Հիմնադրամի 19-րդ հեռուստամարաթոնը կմեկնարկի նոյեմբերի 24-ին` Երևանի ժամանակով ժամը 22:00-ին: 12 ժամ շարունակ այն ուղիղ եթերով կհեռարձակվի Հայաստանի Հանրային, Արմենիա, Շանթ և Երկիր Մեդիա հեռուստաալիքներով, ինչպես նաև առցանց` himnadram.org։
