ԵՐԵՎԱՆ, 11 նոյեմբերի-Sputnik. ՀՅԴ բյուրոյի հայ դատի և քաղաքական հարցերի գասենյակի պատասխանատու Կիրո Մանոյանը կարծում է, որ նախորդ նախագահական ընտրությունների պես, այս անգամ էլ ԱՄՆ հայ համայնքը չսատարեց թեկնածուներից ոչ մեկին։ Սակայն դա չի նշանակում, որ հայ համայնքը պասիվ դիրքերում էր։
«Պետք չէ մոռանալ, որ տեղի ունեցան նաև կոնգրեսական ընտրություններ, 460 թեկնածուներից հայ դատը պաշտպանեց 130 թեկնածուի, նրանցից 90 տոկոսն ընտրվել է»,-ասաց Մանոյանը։
Թե ինչու թեկնածուներից ոչ մեկը հայերի «սրտով» չէր, Մանոյանը դրա համար պատասխան ունի. Քլինթոնը հասցրել էր իր կեցվածքը ցույց տալ պետքարտուղարության օրոք, նա հատուկ հետարքրքություն երբեք էլ չի ունեցել հայերի հարցերի նկատմամբ։
«Իսկ Թրամփի քարոզարշավի տրամաբանությունն այն էր, որ պետք չէ տուրք տալ տարբեր շահեր հետապնդող կազմակերպություններին, դա ևս պատճառ է, որ նման աջակցություն չլինի»,-ասաց նա։
Եվրոպական ուսումնասիրությունների կենտրոնի ղեկավար Արթուր Ղազինյանն էլ կարծում է, որ Թրամփը լուրջ խնդիրներ առաջացրեց արժեհամակարգային դաշտում։
«Շատ կարևոր է Եվրամիություն-Միացյալ Նահանգներ հարաբերությունը։ Իր ամբողջ նախընտրական քարոզարշավը Թրամփը կառուցեց հակասական թեզերի վրա։ Կրոնական, ազգային խտրականության կոշտ երևույթներ, մարդկանց ձերբակալություն. սա եվրոպական միության երկրների համար նեգատիվ արձագանք կտա»,-ասաց նա։
Ղազինյանն ավելացրեց, որ դա պարարտ հող է ստեղծում Ռուսաստանի համար, որը Եվրոպայում ավելի ազատ կկարողանա գործել։
Բանախոսների շրջանում այս պահին Դոնալդ Թրամփը վստահություն չի ներշնչում, քանի որ նա այն կերպարն է, որը 24 ժամվա ընթացքում կարող է կարծիք փոխել։
