ԵՐԵՎԱՆ, 11 նոյեմբերի — Sputnik. Ուկրաինայի Անվտանգության ծառայությունը հայտարարել է, որ Հայաստանի քաղաքացի Արմեն Մարտիրոսյանը, որի անունը շոշափվել է «Բելավիա» ավիաընկերության ինքնաթիռի հետ կապված միջադեպում, ուղղակիորեն կապված է այն հասարակական կազմակերպությունների հետ, որոնք ընդգրկված են Ուկրաինայի իրավիճակն ապակայունացնելու ծրագրում։
«ՈՒԱԾ-ն արտաքին հետախուզության ծառայության հետ օպերատիվ տվյալներ է ստացել, որոնք բացահայտում են ՌԴ ծրագրերը` կապված Ուկրաինայում իրավիճակի լայնածավալ ապակայունացման հետ։ Ծրագրի մեկնարկը նախատեսված է ընթացիկ տարվա նոյեմբերի 15-ին»,- ուրբաթ օրը կայացած ճեպազրույցում հայտարարել է ՈՒԱԾ ազգային պետականության պաշտպանության բաժանմունքի պետ Անատոլի Դուբլիկը։
Նրա խոսքով` այդ ծրագիրն իրագործվում է Ռուսաստանի նախագահի օգնական Վլալդիսլավ Սուրկովի միջոցով, իսկ Ուկրաինայում բողոքի ակցիաներում ներառված քաղաքական շարժումների և հասարակական կազմակերպությունների հետ անմիջական կապերի հաստատումն իրականացրել է Հայաստանի քաղաքացի Մարտիրոսյանը։
Կիև-Մինսկ չվերթն իրականացնող «Բելավիա» ավիաընկերության ինքնաթիռը հոկտեմբերի 21-ին ստիպված է եղել վերադառնալ Կիևի օդանավակայան, քանի որ ուկրաինական իշխանությունները սպառնացել են կործանիչներ բարձրացնել ինքնաթիռում գտնվող «հակամայդանցի» Արմեն Մարտիրոսյանի պատճառով: Վայրէջքից հետո Ուկրաինայի իրավապահ մարմինները չվերթից հանել են Հայաստանի քաղաքացուն: Բելառուսի ԱԳՆ-ն արդեն բողոքի նոտա է հղել Ուկրաինային՝ Կիևում բելառուսական ինքնաթիռի հարկադրված վայրէջքի համար:
Ինչպես նշել է Ուկրաինայի Անվտանգության ծառայության աշխատակիցը, գերատեսչությունը տեղեկություն է ստացել, որ Կիև-Մինսկ չվերթն իրականացնող ինքնաթիռում օտարերկրյա քաղաքացի կա, որը կարող է սպառնալիք ներկայացնել ազգային անվտանգությանը:
