ԵՐԵՎԱՆ, 10 նոյեմբերի — Sputnik, Լաուրա Սարգսյան. Նորքի տուն-ինտերնատի խոհանոցում անսովոր իրարանցում էր։ Այսօր այստեղ է այցելել ՀՀ առաջին տիկինը` տեղում ծանոթանալու կատարված աշխատանքներին և նոր պայմաններին։
Այս կապակցությամբ ծերերը հատուկ զարդարվել էին։ Մինչ Ռիտա Սարգսյանը ուսումնասիրում էր խոհանոցը, լրագրողները որոշեցին զրուցել նրանց հետ, որոնց համար ինտերնատը հարազատ տուն է դարձել։
«Այստեղ ավելի մաքուր և հաճելի է վերանորոգումից հետո։ Ինչպե՞ս կարող ենք մենք դժգոհ լինել, եթե մեր երեխաները մեզ թողել են, և մեր մասին այսօր հոգ են տանում ուրիշները», — Sputnik Արմենիայի թղթակցի հետ զրույցում ասաց Լուսյա տատիկը։
Նա արդեն մի քանի տարի ապրում է տուն-ինտերնատում և ընտելացել է ինչպես իր ճակատագրին, այնպես էլ պայմաններին։ Ժամանակ առ ժամանակ նրան այցելում է դուստրը, իսկ որդին ընտանիքի հետ Մոսկվայում է բնակվում։
«Ինձ մի լուսանկարեք», — մեր լուսանկարչին դիմելով` ասաց տատիկը և բացատրեց. «աղջիկս շատ էմոցիոնալ է այդ հարցերում, և եթե լուսանկարս տեսնի, ցավ կզգա»։
Ավետիք Թումասյանն այստեղ է հայտնվել սեփական տունը կորցնելուց հետո։ Նա գոհ է ծերանոցում իր կյանքից և կարծում է, որ կարող էր նաև ավելի վատ լինել։ Ավետիք պապն արդեն հասցրել է այստեղ ընկերներ ձեռք բերել, որոնց հետ ազատ ժամանակ թուղթ, նարդի և դոմինո է խաղում։ Նրանք միասին ֆիլմեր են դիտում և զբոսնում այգում։
«Հիմնականում վիճում ենք մանրուքների համար, կյանքի մասին», — ժպտում է պապը։
Ծերանոցի 224 բնակիչների թվում կան նաև այստեղ ավելի քան տասը տարի բնակվողներ։ Այս ապաստանը նրանց համար ժամանակին փրկություն դարձավ, որ չխելագարվեն միայնությունից, կամ անտուն չմնան։
«Բոլորի բախտը չի բերում երեխաների հարցում, աղջի՛կս։ Հոգ տար ծնողներիդ մասին, չէ՞ որ նրանք քեզ նվիրել են ամենակարևորը` կյանք», — նշեց տատիկներից մեկը` սրբելով արցունքը։
Վերանորոգման աշխատանքները տուն-ինտերնատում դեռ չեն ավարտվել։ Կարգի են բերվել ճաշասենյակը, խոհանոցի տարածքը, միջանցքը։ Այս տարիների ընթացքում ծերերին ապահովել են ինտերնետ-կապով, և նրանք ամեն շաբաթ կարող են զրուցել իրենց հարազատների հետ սկայպով։ Շենքը ջեռուցվում է, սակայն ջեռուցումը միացնում են միայն երեկոյան։ Նման տուն-ինտերնատներ Հայաստանում երեքն են` երկուսը Երևանում և մեկը` Գյումրիում։
