ԵՐԵՎԱՆ, 10 նոյեմբերի — Sputnik. Նոյեմբերի 11-ին «Հանրապետական» մարզադաշտում ԱԱ-2018-ի ընտրական խմբային փուլի հերթական խաղում Հայաստանի հավաքականը հյուրընկալելու է Չեռնոգորիայի թիմին:
Հայաստանի ազգային հավաքականի նորանշանակ գլխավոր մարզիչ Արթուր Պետրոսյանի համար այս հանդիպումը կլինի դեբյուտային պաշտոնական խաղերում: Խաղի նախօրեին հավաքականի մարզիչը պատասխանել է լրագրողների հարցերին:
Արթուր Պետրոսյանը բոլորին հայտնի է իր կրակոտ խաղով, երբ ներկայացնում էր տարբեր ակումբներ ու Հայաստանի ազգային հավաքականը: Ինչքան, որ վտանգավոր էր Պետրոսյանը խաղադաշտում, այնքան մեղմ` խաղադաշտից դուրս: Շատ լավ ծանոթ լինելով հավաքականի «հանդերձարանին»` պարզ էր, որ հավաքականի երեք անընդմեջ պարտությունից հետո Պետրոսյանը պետք է մտածեր ֆուտբոլիստների հոգեբանական վիճակի մասին: Եվ շատ կարևոր է, որ խաղից առաջ մարզիչը նշեց.
«Հոգեբանական խնդիրը, ինձ թվում է, լուծվել է: Տղաները ժպտում են ու պատրաստվում խաղին: Մթնոլորտը թիմում շատ նորմալ է, իսկ թե ինչպես դա կանդրադառնա ֆուտբոլիստների գործողությունների վրա խաղադաշտում, կերևա խաղի ժամանակ»:
Բնականաբար, բոլորին առաջին հերթին հետաքրքրում է Հայաստանի հավաքականի առաջատար Հենրիխ Մխիթարյանի վիճակը: Առանց խաղային պրակտիկայի Մխիթարյանը, իրոք, ապացուցելու շատ բան ունի, ու առաջին հերթին` Ժոզե Մոուրինյոյին: Արթուր Պետրոսյանը թիմի առաջատարի մարզավիճակը գնահատեց լավ ու նշեց, որ թիմի ավագը շատ լուրջ է պատրաստվում խաղին ու տրամադրված է մարտական: Թեև ոչ-ոքի արդյունքն էլ երեք աընդմեջ պարտությունից հետո դրական լիցք կհաղորդի հայ ֆուտբոլիստներին:
Նշենք նաև այն, որ հավաքականի մարզիչն ու նրա օգնականները որոշակի փոփոխություններ են մտցրել թիմի պաշտպանությունում: Բայց այդ մասին մարզիչը, հասկանալի պատճառներով, չխոսեց: Նույնը վերաբերում է նաև հարձակման գծին:
Վնասվածքի պատճառով Չեռնոգորիայի հանդիպմանը չի մասնակցի Դավիթ Մանոյանը: Այստեղ էլ մարզիչը նոր լուծում պետք է գտնի:
Խաղից առաջ Արթուր Պետրոսյանը կողմերի հաղթելու հնարավորությունները գնահատում է հավասար: Բայց, բնականաբար, գտնում է, որ հաղթելու մեծ ցանկություն կա: Խաղից առաջ Հայաստանի հավաքականն անցկացրեց իր վերջին մարզումը։
Հայաստանի հավաքականը խմբային պայքարում կորցնելու ոչինչ չունի. եզրափակում է աղյուսակը առանց միավորների: Բայց, միևնույնն է, պատասխանատվությունը շատ մեծ է, Արթուր Պետրոսյանին ու հավաքականին պետք է հաղթանակ:
