ԵՐԵՎԱՆ, 5 նոյեմբերի — Sputnik. Ոստիկանության ՊՊԾ գնդի տարածքում հրազենային վիրավորում ստացած՝ «Դատապարտյալների հիվանդանոց» ՔԿՀ կալանավորված անձ Հովհաննես Հարությունյանի առողջական վիճակի գործով այսօր քրեակատարողական հիմնարկ կատարված այցելության հիման նախաձեռնվել է նաև հարցի քննարկման գրավոր ընթացակարգ: Այս մասին հայտնում է ՄԻՊ գրասենյակը:
Մասնավորապես, քրեակատարողական հիմնարկ կատարված հատուկ այցելության արդյունքներով՝ Հ. Հարությունյանի պահման պայմանների, նրան ցուցաբերվող բուժօգնության հարցերի, բժշկական փաստաթղթերի ուսումնասիրության, առողջական վիճակի կապակցությամբ նախապատրաստվել է Արդարադատության նախարարությանն ուղղված լրացուցիչ գրություն:
Դրանում, այլ հարցերի թվում, ևս մեկ անգամ բարձրացվել է Հովհաննես Հարությունյանի ոտքի վիրահատության, ինչպես նաև վկայակոչվող՝ արտերկրյա բժիշկների եզրակացությունները կամ հարցադրումները ստանալուն պես անհապաղ դրանց մանրամասն քննարկում իրականացնելու հարցերը, ինչպես նաև պահանջվել են Մարդու իրավունքների պաշտպանին ներկայացնել պարզաբանումներ դրանց քննարկման կապակցությամբ:
Մարդու իրավունքների պաշտպանի աշխատակազմը նկարագրված հարցերով գործում է կարգավիճակի առավելագույն հնարավորություններով՝ առանձնակի կարևորելով անազատության մեջ պահվող անձի առողջական վիճակի վերաբերյալ ցանկացած հարցի մանրամասն քննարկում և լուծում:
Նշենք, որ նախօրեին Հովհաննես Հարությունյանի փաստաբան Նաիրա Միրզոյանը ԶԼՄ-ներին հայտնել էր, որ ՊՊԾ գնդի գրավման օրերին վիրավորված Հովհաննես Հարությունյանի ոտքը սևացել է, անզգայացել ու սառչել, և Հարությունյանը խնդրում է բժիշկներին վիրահատել իր անզգայացած ոտքը:
