ԵՐԵՎԱՆ, 4 նոյեմբերի — Sputnik. Twitter, Facebook և WhatsApp հայտնի ծառայությունների հասանելիությունը Թուրքիայում արգելափակվել է Թուրքիայի խորհրդարանի քրդամետ Ժողովուրդների դեմոկրատական կուսակցության 11 պատգամավորների ձերբակալությունից հետո։ Այս մասին հայտնում է BBC-ն։
Ինչպես հայտնում են թուրքական առցանց-ռեսուրսները, արգելափակումը վերաբերում է առաջին հերթին բջջային հավելվածներին։
Թուրքիայի խորհրդարանի քրդամետ Ժողովուրդների դեմոկրատական կուսակցության համանախագահներ Սելահաթին Դեմիրթաշը և Ֆիգեն Յուքսեքդաղը բերման են ենթարկվել ուրբաթ առավոտյան։
Համացանցի օգտատերերը նաև նշում են, որ արգելափակումը կարող է կապված լինել պետական չհաջողված հեղաշրջման փորձի հետ։
Ինչպես պնդում է Turkey Blocks համացանցի մոնիտորինգի միությունը, բոլոր այդ կայքերն ու հավելվածները արգելափակվել են այսպես կոչված «խեղդման» մեթոդով, երբ կայքէջերի աշխատանքն արհեստականորեն դանդաղեցվում է այնքան, որ դրանցից օգտվել այլևս հնարավոր չի լինում։
Ավելի վաղ դիտորդները հայտնել էին, որ համացանցի հասանելիությունն ամբողջապես արգելափակվել է քրդաբնակ հատվածում` Թուրքիայի հարավ-արևելքում։ Turkey Blocks տվյալով` շուրջ 6 մլն մարդ զրկվել էր համացանցի հասանելիությունից։
