ԵՐԵՎԱՆ, 4 նոյեմբերի — Sputnik. Այս շաբաթվա ընթացքում Սիրիայից Հայաստան է տեղափոխվել սիրիահայերի 7 ընտանիք՝ 28 հոգի: Այս մասին հայտնեց սփյուռքի նախարար Հրանուշ Հակոբյանն ու տեղեկացրեց, որ բոլոր այն ընտանիքները, որոնք հայրենիքում բնակության տեղ չունեն, տեղավորվում են ժամանակավոր կացարաններում, այնուհետև տեղափոխվում են վարձակալած բնակարաններ:
«Մինչև արյունալի ուրբաթ, այսինքն՝ սեպտեմբերի 30-ը, Հայաստան եկել է 420 հոգի, սեպտեմբերի 30-ից հետո, ամբողջ հոկտեմբերի ընթացքում Հայաստան է եկել 47 հոգի, այսինքն՝ ավելի քիչ, քան մնացած ամիսներին: Իսկ նոյեմբերի 1-ից հետո՝ այս 4-5 օրվա ընթացքում, Հայաստան եկել է 28 հոգի»,- ասաց Հրանուշ Հակոբյանը՝ միաժամանակ վստահեցնելով, որ Հայաստան գալ ցանկացող ոչ մի սիրիահայ մերժում չի ստանում:
Սփյուռքի նախարարը չթաքցրեց, որ կառավարությունը միայն սեփական միջոցներով անկարող է հոգալ սիրիահայերի բոլոր կարիքները, ուստի շատ հաճախ դիմում է նաև մասնավոր և բարեգործական կազմակերպությունների աջակցությանը:
Անդրադառնալով սփյուռքահայերի՝ Հայաստանում գործարար ներդրումներ անելու հարցին, Հրանուշ Հակոբյանը հայտարարեց, որ նոր կառավարությունը նրանց շատ ավելի մեծ վստահություն է ներշնչել:
«Կա ոգևորություն, մտածում են գալ, մտածում են այստեղ ներդրումներն ակտիվացնել: Վարչապետի հայտարարությունները, ծրագիրը, հարցադրումներ, կոնկրետությունը հավատ են ներշնչել»,- ասաց Հրանուշ Հակոբյանը՝ հրաժարվելով, սակայն, նշել, թե նախորդ կառավարությունն ու վարչապետն ինչու նույն վստահությունը չէին ներշնչում:
