ԵՐԵՎԱՆ, 4 նոյեմբերի — Sputnik. Սաթիկի ամուսինը զոհվել է Քեսաբում, կինը մնացել է երկու զավակի հետ ու շարունակում է ապրել Քեսաբում: Իր դժվար կացության մասին նա պատմել է «Արևելք» պարբերականին:
«Հոգնել եմ ֆիզիկապես, հոգեպես և բարոյապես: Միակ մտահոգությունս որբացած դուստրերս են: Ամեն գնով ուզում տեր կանգնել նրանց, բայց մենակ եմ ու անտեր: Ծանր վիճակում եմ, հուսամ՝ կլինեն մարդիկ, որոնք մեզ օգնության ձեռք կմեկնեն»,- ասել է նա:
Սաթիկը հույսը չի կորցրել, հավատացած է, որ իրենով ու իր զավակներով հետաքրքրվողներ անպայման կլինեն:
Պարբերականն այս ընտանիքի մասին մեկ այլ նամակ էլ է ստացել. Նամակագիրն ամերիկաբնակ հայուհի է, որը խնդրել է չհրապարակել իր անունը:
«Սաթիկն առողջական լուրջ խնդիրներ ունի, գրեք նրա մասին որպեսզի մարդիկ տեղեկանան ու օգնության ձեռք մեկնեն»,- գրել է նա՝ նշելով, որ Սաթիկը դիմել է Քեսաբի տարբեր մարմինների, սակայան նրա խնդրանքներին չեն ընդառաջել:
Սաթիկի ամուսինը՝ Շանթ Հովհաննիսյանը, զոհվել է Քեսաբի դեպքերի նախօրեին, զինյալները նրա մարմինը թողել են տան բակում: Ավելի ուշ Սաթիկը վերադարձել է Քեսաբ, հայտնաբերել ամուսնու դիակն ու թաղել գյուղի գերեզմանատանը: Այդ դեպքերից հետո նա հոգեկան մեծ ցնցումներ է ապրել և հայտնվել բավական դժվարին ու անմխիթար վիճակում:
