ԵՐԵՎԱՆ, 4 նոյեմբերի — Sputnik. Ռուսական «Պոբեդա» ավիաընկերությունն առայժմ որոշում չի կայացրել Գյումրու ուղղությամբ թռիչքներ իրականացնելու մասին, Sputnik Արմենիային հաղորդեց ընկերության մամուլի քարտուղար Ելենա Սելիվանովան։
«Առայժմ որոշում չի ընդունվել»,- ասաց Սելիվանովան։
ՔԱԳՎ հաղորդագրության համաձայն` «Պոբեդան» նոյեմբերի վերջին թռիչքներ կիրականացնի Գյումրիից Մոսկվա։ Վարչությունից հայտնել են, որ «Պոբեդան» թռիչքները կիրականացնի 20 դոլարով։
Ավելի վաղ տեղեկություն էր տարածվել նաև այն մասին, որ ավիաընկերությունը հրաժարվել է թռիչքներ կատարել Երևան` «Զվարթնոց» օդանավակայանի սպասարկման բարձր գների պատճառով։
«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2015 թվականի արդյունքներով` ավիաընկերությունը սպասարկել է 3.09 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 7-րդ տեղն է զբաղեցրել:
