ԵՐԵՎԱՆ, 4 նոյեմբերի — Sputnik. ՀՀ հանրային ծառայությունները կարգավորող հանձնաժողովը էլեկտրական էներգիայի արտադրության և ծառայությունների մատուցման, ինչպես նաև վերջնական սպառողներին վաճառվող էլեկտրաէներգիայի սակագների վերանայման գործընթաց է սկսում։ Այս մասին հայտնում է ՀՀ հանրային ծառայությունները կարգավորող հանձնաժողովի մամուլի ծառայությունը։
Հաղորդագրության մեջ նշված է, որ հանձնաժողովը հաշվի առել 2017թ. փետրվարի 1-ից մինչև 2018թ. փետրվարի 1-ն ընկած ժամանակահատվածի համար կանխատեսվող էլեկտրական էներգիայի (հզորության) արտադրության, ներկրման և արտահանման հաշվեկշիռը, «Գազպրոմ Արմենիա» ՓԲԸ-ի ներկայացրած հայտի արդյունքում՝ ջերմային կայաններին վաճառվող բնական գազի սակագնի հնարավոր փոփոխությունը, էլեկտրաէներգետիկական համակարգում գործող ընկերությունների ֆինանսատնտեսական գործունեության վրա ազդող այլ գործոնների փոփոխությունները և հիմք է ընդունել «Էներգետիկայի մասին» ՀՀ օրենքի 22-րդ հոդվածի 5-րդ և 6-րդ մասերը:
Հիշեցնենք, որ սեպտեմբերի 15-ին Կարեն Կարապետյանը կառավարության իր անդրանիկ նիստը սկսել էր հանձնարարականներով։ Աշխատանքի և սոցիալական հարցերի, էներգետիկայի և բնական պաշարների նախարարություններին ու Հանրային ծառայությունները կարգավորող հանձնաժողովին նա հանձնարարել էր էլեկտրաէներգիայի և գազի սակագները վերանայելու ուսումնասիրություններ անցկացնել։
Նշենք, որ Աշխատանքի և սոցիալական հարցերի նախարար Արտեմ Ասատրյանն ավելի վաղ հայտնել էր, որ հանրապետությունում հաշվառված է 130 հազար սոցիալապես անապահով անձ։ Գազի և էլեկտրաէներգիայի սակագների հնարավոր նվազումը պետք է վերաբերի հենց այդ խմբին։
