ԵՐԵՎԱՆ, 3 նոյեմբերի — Sputnik. Վարչապետ Կարեն Կարապետյանը արդարադատության նախարար Արփինե Հովհաննիսյանին հանձնարարեց օրենքի նախագիծ մշակել ապօրինի հարստացման քրեականացման վերաբերյալ:
«Այն դեպքերում, երբ պաշտոնական անձի ակտիվների աճը էականորեն գերազանցում են նրա օրինական եկամուտները, նա պետք է ենթարկվի քրեական պատասխանատվության: Արդարադատության նախարարին հանձնարարում եմ երկշաբաթյա ժամկետում նախագիծը ներկայացնել կառավարությանը»,- ասաց վարչապետը:
Դրա հետ մեկտեղ նա հանձնարարեց ներկայացնել կանխիկ գործառնությունները սահմանափակող օրենքների նախագիծ: Վարչապետի համոզմամբ՝ փոխառությունները, կեղծ նվիրատվությունները հիմնականում կատարվում են կանխիկ եղանակով և գործընթացը դարձնում են սկզբունքորեն անվերահսկելի:
«Շատ դեպքերում պարզ չէ՝ արդյոք հայտարարագիր ներկայացրած անձն իրականում ստացել է հայտարարագրում նշված փոխառությունը, թե ոչ: Այս խնդիրների լուծման նպատակով հանձնարարում եմ արդարադատության նախարարին Կենտրոնական բանկի հետ համատեղ երկշաբաթյա ժամկետում կառավարության քննարկմանը ներկայացնել կանխիկ գործառնությունների սահմանափակման օրենքի նախագիծը»,-ասաց գործադիրի ղեկավարը:
Հաջորդ հանձնարարականով վարչապետն անհրաժեշտություն տեսավ ընդլայնել բարձրաստիճան պաշտոնատար անձանց էթիկայի հանձնաժողովի լիազորությունները՝ սահմանելով կրթական, կոռուպցիայի կանխարգելման գործառույթները:
«Պետք է օրենքով սահմանել պահանջ, և այդ մարմինները կոռուպցիայի դեմ կատարած իրենց քայլերի մասին պետք է ամեն տարի հավելյալ հաշվետվություն ներկայացնեն։ Հանձնարարում եմ արդարադատության նախարարին մեկամսյա ժամկետում ներկայացնել համապատասխան օրենսդրական նախագիծ»,-ասաց Կարապետյանը:
Եվս մեկ հանձնարարական արդարամտության նախարարին. այսուհետ պետք է անդրադառնալ նաև հայտարարագիր ներկայացնող անձանց շրջանակի ընդլայնմանը:
«Իհարկե, ներկայումս արդեն պաշտոնատար անձանց մի ստվար զանգված, օրինակ` կառավարության անդամները, դատավորները և այլն, ներկայացնում են հայտարարագիր, բայց կան հայտարարագիր չներկայացնող պաշտոնատար անձինք, որոնք ընդգրկված են խոշոր պետական գնումների գործընթացում կամ այլ կոռուպցիոն ռիսկեր ներկայացնող շրջանակներում»,-ասաց նա:
Նախարարին հանձնարարեց երեքշաբաթյա ժամկետում ներկայացնել առաջարկություն հայտարարագիր ներկայացնող անձանց շրջանակի ընդլայնման վերաբերյալ՝ ելնելով ռիսկայնությունից, կազմակերպել հանդիպումներ քաղաքացիական հասարակության ներկայացուցիչների հետ, ընդդիմության և բոլոր շահագրգիռ կողմերի հետ և ըստ անհրաժեշտության ներկայացնել առաջարկ կոռուպցիայի դեմ պայքարի խորհրդի կազմավորման սկզբունքների, կազմի վերանայման վերաբերյալ։
