ԵՐԵՎԱՆ, 3 նոյեմբերի — Sputnik. Հայաստանը պրոֆեսիոնալ անիմատորների կարիք ունի, դրա համար անհրաժեշտ է բացել անիմացիայի ֆակուլտետ, հինգշաբթի Sputnik Արմենիա միջազգային մամուլի կենտրոնում ասաց «ՌեԱնիմանիա» փառատոնի հիմնադիր-տնօրեն Վրեժ Քասունին։
Նրա խոսքով` դեռ վաղ է բացել փակագծերը, և ավելի լավ է առաջ չանցնել։
«Անիմացիայի ֆակուլտետի ստեղծումը և բացումը լուրջ գործ է։ Դա կախված է ոչ միայն ինձանից, այլև պետությունից։ Մենք առաջին տարին չէ, որ սեփական միջոցներով պատրաստում ենք երիտասարդ անիմատորներ և ուղարկում նրանց այլ երկրներ` վարպետության դասընթացների և վերաորակավորման», — պատմեց Քասունին։ Նա հավելեց, որ անձամբ զբաղվում է այդ հարցով, բայց «մի ձեռքով ծափ չես տա»։
Քասունին նշեց, որ հիմա բանակցություններ են ընթանում այդ հարցի շուրջ, բայց առայժմ վաղ է խոսել ֆակուլտետի բացման մասին։ Նրա խոսքով` գլխավորը կատարված աշխատանքները չվնասելն է։
«Ես երազում եմ, որպեսզի 2017-2018թթ. ուսումնական տարում ֆակուլտետն աշխատի։ Հնարավոր է` դա լինեմ ոչ թե ես, այլ ուրիշ իրազեկ և պրոֆեսիոնալ մարդ, ես միայն ուրախ կլինեմ։ Անձամբ ես դեմ չեմ փորձի փոխանակմանը»,- ասաց «ՌեԱնիմանիայի» տնօրենը։
Նա հավելեց, որ Հայաստանում կան անիմատորներ, բայց նրանց թիվը շատ քիչ է։
Քասունին ամփոփեց նաև «ՌեԱնիմանիա» 8-րդ միջազգային փառատոնի արդյունքները, որի շրջանակում Երևան էին ժամանել օտարերկրյա հյուրեր։ Այդ առումով հատկապես նշանակալի է անվանի ամերիկացի անիմատոր Բիլ Փլիմթոնի այցը։
«Բիլ Փլիմթոնի հետ հանդիպմանը մասնակցել է ավելի քան 200 մարդ։ Ֆրանսիական անիմացիոն պրոդյուսերական ընկերության ղեկավար Ժան Պոլ Քոմենի և այլ անիմատորների հետ վարպետության դասընթացները շատ լավ են անցել։ Լեհաստանից հյուրերի հետ հանդիպումը նույնպես արդյունավետ է եղել։ Ամենայն հավանականությամբ` Հայաստանի Ազգային կինոակադեմիան կկարողանա նոր համաձայնագրեր կնքել լեհ գործընկերների հետ»,- ասաց Քասունին։
Նա հավելեց, որն այս տարի շատ են եղել խորիմաստ ֆիլմերը, և ոչ մի «ավելորդ» ֆիլմ չի եղել։ Այս տարի տարբեր անվանակարգերում հաղթել է վեց ֆիլմ։ Օրինակ` «Լավագույն հայկական անիմացիոն ֆիլմ» անվանակարգում հաղթել է Հայկ Սայդայանի «Պապիկիս երազը» ֆիլմը, իսկ «Լավագույն կարճամետրաժ ֆիլմ» կոչմանն արժանացել է ռեժիսոր Ալբերտո Վասքեզի «Բեմադրված» ֆիլմը։
Երևանի միջազգային անիմացիոն «ՌեԱնիմանիա» կինոփառատոնը ստեղծվել է 2009-ին: Փառատոնի նպատակն է խթանել անիմացիոն արվեստի զարգացումը, կրթել միջազգային մակարդակի անիմատորների նոր սերունդ և միջազգային տարբեր հարթակներում հայ անիմատորների աշխատանքները ներկայացնելու հնարավորություն ստեղծել:
Ամեն տարի փառատոնի շրջանակում տեղի են ունենում բազմաթիվ անիմացիոն ֆիլմերի միջազգային և տարածաշրջանային պրեմիերաներ, Հայաստան են ժամանում համաշխարհային ճանաչում ունեցող անիմատորներ և ոլորտի անվանի ներկայացուցիչներ, անցկացվում են վարպետության դասեր, սեմինարներ։
Հոկտեմբերի 28-ից նոյեմբերի 3-ը Երևանում տեղի է ունեցել «ՌեԱնիմանիա» անիմացիոն ֆիլմերի 8-րդ միջազգային փառատոնը։
