ԵՐԵՎԱՆ, 3 նոյեմբերի — Sputnik. Հայաստանն ակնկալում է մոտ ապագայում ավարտին հասցնել Եվրոպական միության հետ համագործակցության նոր և համապարփակ իրավական փաստաթղթի շուրջ բանակցությունները: Այս մասին Ազգային ժողովում ՀՀ 2017թ. պետական բյուջեի նախագծի քննարկման ժամանակ հայտարարեց ՀՀ արտաքին գործերի նախարարի տեղակալ Կարեն Նազարյանը՝ պատասխանելով պատգամավորների հարցերին:
Նա նշեց, որ 2016 թ-ը Հայաստանի համար Եվրոպական միության հետ համագործակցության առումով ինտենսիվ ժամանակաշրջան է եղել: Շարունակվել են երկկողմ արտաքին քաղաքական շփումները, ստորագրվել են համագործակցության մի շարք փաստաթղթեր, այդ թվում` վիզաների դյուրացման մասին համաձայնագիրը:
Սակայն ԱԺ ԲՀԿ խմբակցության ղեկավար ԱԺ Եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը նշեց, որ վիզաների դյուրացման մասին համաձայնագրի իրականացման մակարդակից, մասնավորապես՝ «Վիզաների կենտրոնի» աշխատանքից ու աշխատաոճից հայաստանյան հասարակությունը դժգոհ է:
««Վիզաների կենտրոն» չարաբաստիկ կանտորա գոյություն ունի, որտեղ ՀՀ քաղաքացիներին ենթարկում են նվաստացման խայտառակ ռիտուալների. Երեխաներին գրկած` գնում, կանգնում են օրերով, անհեթեթ գումարներ են գանձում, ընդամենը սկրեպ խփելու համար պարտադրում տասնյոթ հազար դրամ մուծել, չգիտեմ ինչքան մեկ այլ տեղ են վճարում: Մենք վավերացրել ենք եվրոպական երկրների հետ վիզաների ռեժիմի դյուրացման պայմանագիրը, սակայն վիզա ստանալը ոչ միայն տասնապատիկ բարդացել է, այլև նվաստացման ռիտուալներ են ներառվել: Եկեք հասկանանք՝ այդ ի՞նչ կանտորա է, ո՞վ է դրա պատասխանատուն, ի՞նչ մարմին է, և ո՞ւր են գնում քաղաքացիներից գանձված գումարները»,- ասաց Նաիրա Զոհրաբյանը:
ԱԳ փոխնախարարը պատգամավորի փոխանցած դժգոհությունները չհերքեց, ավելին` ասաց, որ նախարարությունն էլ տեղյակ է և փորձում է շտկել խնդիրները: Կարեն Նազարյանը չհամաձայնեց միայն հավելյալ գումարներ պահանջելու ահազանգին:
«Ինձ համար տարօրինակ է, որովհետև վիզայի ստացման արժեքը չպետք է լինի 30 եվրոյից ավելի: Տարօրինակ է, որ հավելյալ գումարներ են գանձվում»,- ասաց նա։
Փոխնախարարը խոստացավ այդ ուղղությամբ ևս ստուգումներ իրականացնել:
