ԵՐԵՎԱՆ, 2 նոյեմբերի — Sputnik. 2016-ի դափնեկիրներ են դարձել Նարինե Աբգարյանը և Ալեքսանդր Գրիգորենկոն: Նարինե Աբգարյանը մրցանակը ստացել է «Երկնքից ընկավ երեք խնձոր» վեպի համար:
Ամենամյա համառուսական «Յասնայա պոլյանա» գրական մրցանակը հիմնվել է 2003 թվականին: Մրցանակաբաշխությունը նպաստում է ռուս դասական գրականության ավանդույթների պահպանմանը և ժամանակակից գրականության արդիական միտումների զարգացմանը:
Նարինե Աբգարյանի գիրքը ներկայացնելիս ժյուրիի անդամ, գրականագետ Ալեքսեյ Վարլամովը նշել է ստեղծագործության մագնիսականությունը:
«Գրքեր կան, որոնք կարդալիս մոռանում ես, որ ժյուրիի անդամ ես, մոռանում ես երկար ու կարճ ցուցակների մասին, մոռանում ես, որ ամառ է, մոռանում ես ընդհանրապես ամեն ինչի մասին և պարզապես շնորհակալ ես հեղինակին զարմանահրաշ աշխարհում հայտնվելու համար: Հենց այդպիսի զգացողությամբ եմ կարդացել Նարինե Աբգարյանի գիրքը: Վեպի գործողությունը տեղի է ունենում Հայաստանի հեռավոր լեռնային գյուղում, որտեղ անշուշտ պատմություն կա, որը, սակայն, տարբերվում է մեծ երկրների պատմությունից»,- իր տպավորությունների մասին ասել է Վարլամովը։
Աբգարյանը և Գրիգորենկոն որպես պարգևավճար 1-ական մլն ռուբլի կստանան:
