ԵՐԵՎԱՆ, 2 նոյեմբերի — Sputnik. «Մանչեսթեր Յունայթեդի» նախկին պաշտպան Ռիո Ֆերդինանդը զարմանում է, թե Հայաստանի կիսապաշտպան Հենրիխ Մխիթարյանն ինչու հանդես չի գալիս անգլիական ակումբի կազմում։ Այս մասին հայտնում է Goal.com-ը։
«Ես չգիտեմ` ինչ է պատահել Մխիթարյանի հետ։ Որևէ մեկը գիտի՞` ո՞րտեղ է նա։ Դատելով ամեն ինչից` նա առողջ է, ակտիվ մարզվում է, բայց նրան չենք տեսնում «Մանչեսթեր Յունայթեդի» մարզաշապիկով։ Իրականում ես կուզեի նրան ֆուտբոլ խաղալիս տեսնել», — ասաց Ֆերդինանդը։
Անցյալ ամառ «Մանչեսթեր Յունայթեդն» ավելի քան 30 մլն ֆունտ վճարեց «Բորուսիայի» հայ կիսապաշտպանի համար, ինչը ենթադրում էր, որ նա պետք է Մոուրինիուի թիմի առաջնորդներից մեկը դառնար։ Սակայն սեպտեմբերի 10-ին «Մանչեսթեր Սիթիի» հետ խաղում կրած պարտությունից հետո Մխիթարյանը ոչ մի անգամ խաղադաշտ դուրս չի եկել։
