ԵՐԵՎԱՆ, 31 հոկտեմբերի — Sputnik. ՀՀ քննչական կոմիտեի կայազորային քննչական բաժնում քննություն է տարվում՝ պարզելու պայմանագրային զինծառայողի մահվան հանգամանքները։ Այդ մասին տեղեկացնում է քննչական կոմիտեի պաշտոնական կայքը։
Նախնական տվյալներով՝ 30.10.2016թ. ժամը 20:00-ի սահմանում ՀՀ ՊՆ N զորամասի պահպանության շրջանում տեղակայված մարտական դիրքում կտրուկ վատացել է մարտական հերթապահության նշանակված պայմանագրային զինծառայող, 1987թ. ծնված Դերենիկ Արտակի Խալխալյանի ինքնազգացողությունը:
Նոյեմբերյանի ԲԿ տեղափոխվելու ճանապարհին Դերենիկ Խալխալյանը մահացել է: Բժշկական նախնական հետազոտության համաձայն՝ զինծառայողի մոտ արձանագրվել է սրտի կանգ:
ՀՀ ՔԿ ԶՔԳՎ վեցերորդ կայազորային քննչական բաժնում քննություն է տարվում՝ պարզելու Խալխալյանի մահվան հանգամանքները: Նշանակվել է դատաբժշկական փորձաքննություն։
