ԵՐԵՎԱՆ, 31 հոկտեմբերի — Sputnik. Հայ երիտասարդները «Հելոուինն» ավելի մեծ շուքով են նշում, քան այլ երկրներում, ինչը հաճախ ծայրահեղությունների է հասնում, լրագրողների հետ հանդիպմանը ասաց «Կանա» քրիստոնեական կրթական կենտրոնի Տաճատ ավագ քահանա Դավիդյանը։
Եկեղեցականը կյանքի մեծ մասն ապրել է ԱՄՆ-ում։ Նրա խոսքով` առաջին հերթին պետք է իմանալ, որ Հելոուինը` «All Hallows' Eve կամ All Saints' Evening»-ի կրճատ տարբերակն է, ինչը թարգմանաբար նշանակում է «Բոլոր սրբերի երեկո»։
Կաթոլիկ եկեղեցին նոյեմբերի 1-ին տոնում է Բոլոր սրբերի օրը։ Նման տոն ունի նաև Հայկական եկեղեցին, և այն նույնպես նոյեմբերին են նշում։
«Միջնադարյան լեգենդի համաձայն` այն մարդկանց հոգիները, որոնց համար ոչ ոք չի աղոթում, ելնում էին գերեզմաններից և տնետուն ընկնում` խնդրելով, որ աղոթեն իրենց համար, և եթե մերժում էին ստանում, ապա անիծում էին այդ տունը», — ասաց Դավիդյանը։
Հենց այդ պատճառով էլ սկզբում ընդունված էր տոնի կապակցությամբ կրել այնպիսի դիմակներ, որոնք հիմնականում կմախքի հետ էին կապված։ Ավելի ուշ առաջացան կախարդների կերպարները, և այդ տոնը սկսեց ասոցացվել սատանայական տոնի հետ։ Սակայն, Դավիդյանի խոսքով, «Հելոուինն» ի սկզբանե չէր նույնացվում սև ուժերի հետ։
Ըստ նրա` վերջին տարիներին ԱՄՆ-ում այդ տոնը նախկինի պես մեծ շուքով չեն նշում։ Երեխաները թակում են միայն ծանոթների դռներն ու քաղցրավենիք են հավաքում։ Երեկոյան ժամը ութին փողոցում արդեն երեխաներ չեն լինում։
ԱՄՆ-ում այդ օրը երեխաները ոչ թե վհուկների, այլ «Բեթմենի», «Սուպերմենի», «Սարդ-մարդու» դիմակներ են կրում։
Ինչ վերաբերում է այս տոնը Հայաստանում նշելու փաստին, ապա Հայ առաքելական եկեղեցու ներկայացուցչի խոսքով` դրա դեմ պայքարել հարկավոր չէ, քանի որ ինչ-որ բան արգելելու կամ սահմանափակելու փորձը միայն հակառակ ազդեցություն է ունենում։
«Հայաստանում մոտ 16 տարի առաջ գրեթե չէին տոնում Հելոուինը։ Սակայն այսօր այն այստեղ ավելի շատ են նշում, քան Ամերիկայում», — ասաց Դավիդյանը։
Հայաստանում այդ տոնին հաճախ սատանայական իմաստ են հաղորդում։ Հենց սրա դեմ է հանդես գալիս Հայ առաքելական եկեղեցին։
«Եթե երիտասարդությունը ուզում է նշել, թող նշի, միայն թե ծայրահեղությունների չգնա, ոգելից խմիչքները չչարաշահի», — ասաց Դավիդյանը։
Նրա կարծիքով` Հելոուինն իր դրական կողմերն էլ ունի. տղաները ծանոթանում են աղջիկների հետ, ընտանիք են կազմում, երեխաներ են ծնվում։
Եկեղեցականը ուշադրություն դարձրեց ևս մեկ ոչ պակաս կարևոր հանգամանքի. Հայաստանում անչափ տարածված է օտարամոլությունը։ Շատերը կարծում են, որ արևմտյան սովորույթներն ու ավանդույթները ավելի լավն են, քան հայկականը, ինչը, Դավիդյանի խոսքով, սխալ ըմբռնում է։
