ԵՐԵՎԱՆ, 30 հոկտեմբերի — Sputnik. «Մանչեսթեր Յունայթեդը» կրկին հաղթանակներ կտանի, եթե Ժոզե Մոուրինյուն իրականացնի հինգ քայլ, գրում է armsport-ը` վկայակոչելով բրիտանական Express-ին։
Առաջինը Զլատան Իբրահիմովիչին պահեստայինների նստարանին նստեցնելն է, քանի որ նա չի կարողանում աչքի ընկնել Պրեմիեր լիգայի 6 խաղում անընդմեջ, իսկ նրա վրիպումների պատճառով ակումբը միավորներ կորցրեց վերջին խաղում:
«Թվում է, որ Պրեմիեր լիգան չափազանց մեծ մարտահրավեր է 35-ամյա ֆուտբոլիստի համար, որը խոստացել է դառնալ «Մանչեսթերի Աստվածը»»,- գրել է պարբերականը:
Երկրորդ ուղին Հենրիխ Մխիթարյանին խաղալու հնարավորություն տալն է։
«Չնայած Իբրահիմովիչի ու Պոլ Պոգբայի տրանսֆերներին` թիմի երկրպագուներից շատերը հիացած էին Մխիթարյանին գործողության մեջ տեսնելուց հետո: Սակայն Հայաստանի հավաքականի ֆուտբոլիստը հազվադեպ է օգտագործվում Մոուրինյուի կողմից և երեկ կրկին բացակայում էր: 27-ամյա ֆուտբոլիստը «Մանչեսթեր Յունայթեդի» ամենաստեղծագործ ֆուտբոլիստներից է, և նրանց գոլային երաշտը միայն մեծացնում է հիմնական կազմում Մխիթարյանին ընդգրկելու կարիքը»,- կարծում է Express-ը:
Հոդվածի հեղինակը գտնում է, որ թե «Չելսիի» նախկին գլխավոր մարզիչը չօգտագործի Մխիթարյանին, ապա նա կարող է նույն բախտին արժանանալ, ինչ Դի Մարիան ու Դեպայը:
Իբրև երրորդ ուղի է նշվում Կարիկին ավելի հաճախ օգտագործելը։
«Գաղտնիք չէ, որ «Յունայթեդն» ավելի շատ է հաղթում, երբ Մայքլ Կարիկը թիմում է: Ալեքս Ֆերգյուսոնը, Դավիդ Մոյեսը և Լուի վան Գալը միշտ նրան օգտագործում էին, նույնիսկ եթե Կարիկը վատ մարզավիճակում էր: Սակայն Մոուրինյուի հետ ամեն ինչ այլ է: Պորտուգալացին խոսում էր վետերանին օգտագործելու ռիսկերի մասին, սակայն Կարիկի կարիքը երբեք այսքան մեծ չի եղել: Մայքլը Բաստիան Շվայնշտայգերի հետ միասին պետք է ավելի շատ հանդիպումների մասնակցի»,- ասված է հոդվածում:
Չորրորդ ուղի է նշված գրոհելը։ Ըստ պարբերականի` Մոուրինյուն ունի հարձակման ներուժ, ու Մխիթարյանի, Մարսիալի ու Մատայի նման ֆուտբոլիստներին պետք է մշտապես օգտագործի:
Եվ վերջին ուղին կրքերը հանդարտեցնելն է, այնինչ 53-ամյա մասնագետն արդեն ցուցադրում է նշաններ, որ նա մոտ է պայթելուն: Մոուրինյուն հեռացվեց «Բարնլիի» հետ խաղում, նրան որակազրկում է սպասվում մինչև այդ Մարտին Ատկինսոնի հասցեին արված մեկնաբանության համար:
