ԵՐԵՎԱՆ, 30 հոկտեմբերի — Sputnik. Հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը Վանաձորում ընթացող Հայաստանի առաջնության առաջին մրցումային օրվանից հետո, պատասխանելով լրագրողների հարցերին, նշել է, որ դժգոհ է մասնակից ըմբիշների քանակից, հայտնում է armsport-ը։
Հոկտեմբերի 29-ին կայացել էր 59, 71, 80 և 98 քաշային կարգերի ըմբիշների պայքարը, իսկ այսօր ընթանում են մյուս քաշային կարգերի մրցումները:
Հավաքականի գլխավոր մարզիչը նշեց, որ ներուժ է տեսնում երիտասարդներով համալրված 59 կգ քաշային կարգում, իսկ 98 կգ քաշային կարգի ըմբիշների քանակը և որակը բավարար չեն:
«Վերջնական ամփոփում չեմ կարող կատարել, քանի որ կա նաև մյուս չորս քաշային կարգերի պայքարը: 59 կգ քաշային կարգում հիմնականում երիտասարդներ են` իրենց թերություններով հանդերձ, բայց տեսնում եմ ներուժ, կարծում եմ, որ լավ աշխատանքի դեպքում ամեն ինչ լավ կստացվի: 71 կգ քաշային կարգում Վարշամ Բորանյանին ես էի ազատել մրցումներից, այսօր առաջին երկու տեղերը գրաված ըմբիշները նույնպես խոստումնալից ըմբիշներ են, ինչը կարող եմ ասել նաև 80 կգ քաշային կարգի համար»,- նշել է Ջուլֆալակյանը:
Նա ասաց, որ դժգոհ է 98 կգ քաշային կարգի մրցումներից. մասնակիցների քանակն էլ է քիչ, որակն էլ` թույլ. «Ցավալի է, բայց փաստ, որ մենք իրականում կաղում ենք այդ քաշային կարգում: Միայն չեմպիոն Վաղինակ Մինասյանն է, որ որակներով ավելի բարձր էր»:
Ջուլֆալակյանը դժգոհել է նաև մասնակիցների քանակից, ինչը, նրա խոսքով, նշանակում է, որ հանրապետության մարզիչները լավ չեն աշխատում։
«Ինչպե՞ս կարող է ունենանք հունահռոմեական ոճի ըմբշամարտի 160 մարզիչ, և Հայաստանի առաջնությանը մասնակցեն մոտ 70 ըմբիշներ: Եթե ամեն մարզիչ մի մասնակից ունենա, արդեն պետք է 160 մասնակից լիներ առաջնությունում: Սա լուրջ բացթողում է: Այս մասին պետք է լուրջ մտածել` ֆեդերացիայով և նախարարությունով, իրոք, այս հարցին պետք է շատ լուրջ մոտեցում»,- ընդգծել է նա:
Դրա հետևանքով, Ջուլֆալակյանի խոսքով, շատ է բարդանում հավաքականի կազմը և որակը ապահովելու հարցը. ըմբիշների քանակը եղել է 95-100, բայց «65-70 հոգին արդեն դա լուրջ խնդիր է»:
«Սկսում ենք նոր քառամյա ցիկլ, և Հայաստանի այս առաջնությունը նախատեսված էր դեկտեմբերին անցկացվելիք ոչ օլիմպիական քաշային կարգերի աշխարհի առաջնությանը նախապատրաստվելու համար: Արդեն հայտարարված էր, որ 80 կգ քաշային կարգի չեմպիոնը պետք է պատրաստվի աշխարհի առաջնությանը, և 71 կգ քաշային կարգում ես նախապես հայտարարել էի, որ Վարշամ Բորանյանը պետք է մասնակցի աշխարհի առաջնությանը»,- ասաց նա:
Մնացած հավաքականը, ըստ Ջուլֆալակյանի, կազմավորվում է: Հաջորդ ուսումնամարզական հավաքները պլանավորված են նոյեմբերի 24-ից մինչև դեկտեմբերի 8-ը և դեկտեմբերի 14-ից մինչև դեկտեմբերի 27-ը: Հայ ըմբիշները պատրաստվելու են հաջորդ տարվա մի շարք մրցաշարերին` Աշխարհի գավաթ, Եվրոպայի առաջնություն, Աշխարհի առաջնություն:
