ԵՐԵՎԱՆ, 29 հոկտեմբերի — Sputnik. Urban Group-ի «Քաղաքներ կյանքի համար» նախագծի գեղարվեստական հեղինակ, անվանի ռուս ճարտարապետ Մաքսիմ Աթայանցն արժանացել է «Ցիրցեայի հրվանդան» 35-րդ միջազգային մրցանակի, հաղորդում է kvadroom.media կայքը:
«Ճարտարապետություն և արվեստ» անվանակարգում պարգևը շնորհվել է վարպետի գեղատեսիլ ճարտարապետական ստեղծագործությունների համար՝ ստեղծված հին հռոմեական մշակույթի կանոններով և անտիկ ճարտարապետության սկզբունքներով, ռուսական և եվրոպական ճարտարապետական տարածությունների միավորման համար: Պարգևատրման արարողությունը կայացել է Հռոմում հոկտեմբերի 21-ին:
«Ցիրցեայի հրվանդան» եվրոպական մրցանակը հիմնվել է 1977թ-ին: Այն հանձնվում է անձանց և կազմակերպությունների, որոնք զգալի ավանդ են ունեցել ժողովուրդների միջև մշակութային և հասարակական կապերի ամրապնդման մեջ:
Մաքսիմ Աթայանցի շատ նախագծեր շինարարության և ճարտարապետության ոլորտում կարևոր մրցանակների են արժանացել: Այսպես, 2016թ-ի սեպտեմբերին Աթայանցի հեղինակային ճարտարապետությամբ կառուցված «Միտինո Օ2» և «Օպալիխա Օ3» բնակելի համալիրները դարձել են European Property Awards 2016-2017 միջազգային մրցանակի հաղթողներ «Ռուսաստանի լավագույն բնակելի համալիրներ» անվանակարգում:
