ԵՐԵՎԱՆ, 27 հոկտեմբերի — Sputnik. ՀՀԿ Գործադիր մարմնի հոկտեմբերի 27-ի նիստում վարչապետ Կարեն Կարապետյանի՝ ՀՀԿ-ին անդամակցելու հարցը չի քննարկվել, նիստից հետո լրագրողներին ասաց ԱԺ փոխնախագահ Էդուարդ Շարմազանովը։
Նա նշեց, որ անկախ նրանից` Կարապետյանը անդամակցելու համար կդիմի, թե չի դիմի կուսակցությանը, նա Հայաստանի հանրապետական թիմի առանցային ներկայացուցիչ է:
«Այս թիմի քաղաքական ղեկավարն ու առաջնորդը Սերժ Սարգսյանն է, և պարոն Կարեն Կարապետյանը մեր թիմի լիարժեք անդամ է, և մենք լիարժեքորեն իր հետ միասին կիսում ենք կառավարության պատասխանատվությունը: ՀՀԿ-ն ինչպես եղել է Վազգեն Սարգսյանի կառավարության պատասխանատուն, այնպես էլ այսօր Կարեն Կարապետյանի կառավարության ամբողջական պատասխանատուն է»,- նշեց Շարմազանովը:
Լրագրողների հարցին ի պատասխան` նա նշեց, որ ԲՀԿ նախկին նախագահ Գագիկ Ծառուկյանի քաղաքականություն վերադառնալու վերաբերյալ որևէ հարց չի քննարկվել ԳՄ նիստում:
«Ձեր նշած գործընկերոջ ներողամտության մասին գրեթե բոլոր լրատվամիջոցների հետ խոսել եմ, ավելացնելու բան չունեմ: Եվս մեկ անգամ կրկնում եմ՝ քաղաքականության մեջ պետք է լինի կոռեկտություն, համերաշխություն, հանդուրժողականություն, քաղաքական մշակույթ: Բոլոր ոչ կոռեկտ գնահատականները պետք է լինեն անցյալում և հերիք է հետ նայեք, վիզներդ ծուռ կման, նայեք առաջ, իսկ ապագան կարծում եմ կլինի գեղեցիկ, ավելի համերաշխ, ավելի հանդուրժողական»,- հայտարարեց ԱԺ փոխխոսնակը:
Նա հայտենց, որ նիստը վարել է կուսակցության նախագահ Սերժ Սարգսյանը, և ՀՀԿ-ականները քննարկել են կուսակցության հերթական համագումարի կազմակերպչական խնդիրները, կուսակցության ծրագրում սպասվելիք փոփոխությունները, ներկուսակցական հարցեր:
