ԵՐԵՎԱՆ, 26 հոկտեմբերի — Sputnik. Սա նախադեպ է, երբ բյուջետային ավիաընկերությունը մուտք է գործում հայկական շուկա: Այսօր, պատասխանելով Գյումրու «Շիրակ» օդանավակայանից դեպի Մոսկվա հայտարարված նոր, էժան չվերթերի մասին հարցին, ասաց Քաղաքացիական ավիացիայի գլխավոր վարչության պետ Սերգեյ Ավետիսյանը:
Թե որքանով է իրատեսական հայտարարած 10 հազար դրամ տոմսի արժեքը, Սերգեյ Ավետիսյանը վստահեցրեց, որ այն իրական է և, համաձայն «Պոբեդա» ավիաընկերության պաշտոնական կայքում հրապարակված հաղորդագրության, ընկերության չվերթերի արժեքը սկսվում է 999 ՌԴ ռուբլիից:
«Այո, ես վստահ եմ, որ այդ ուղղության համար տոմսերը լինելու են ցածր գնով»,- ասաց Ավետիսյանը:
10 հազար դրամից սկսվող տոմսերի առավելագույն գինը, Սերգեյ Ավետիսյանի խոսքով, շատ բարձր լինել չի կարող, քանի որ հակառակ դեպքում չվերթը մրցունակ չի լինի:
Քաղավիացիայի վարչության պետը նաև տեղեկացրեց, որ չվերթերն իրականացվելու են Boing 730-800 ինքնաթիռով, որը նախատեսված է մոտ 180 ուղևորի համար:
Ի դեպ, «Պոբեդայի» էժան չվերթերը, Սերգեյ Ավետիսյանի խոսքով, կարող են ազդել նաև այլ ավիաընկերությունների տոմսերի գնի վրա:
«Ցանկացած նոր ավիաընկերություն, որը մուտք է գործում հայկական շուկա, այս կամ այն կերպ իր ազդեցությունն է թողնում տոմսերի գների վրա: Ես կարծում եմ՝ ինչ-որ փոփոխություն կլինի, սա շատ լավ առիթ է խոսելու Գյումրու մասին»,- ասաց Սերգեյ Ավետիսյանը:
Նա նաև նշեց, որ Գյումրու «Շիրակ» օդանավակայանը նախատեսվում է զարգացնել հատկապես որպես բյուջետային ավիաընկերությունների համար աշխատող օդանավակայան, իսկ «Պոբեդան» այս ծրագրի իրականացման առաջին քայլն է:
Հիշեցնենք` Քաղաքացիական ավիացիայի գլխավոր վարչությունը հայտարարել էր, որ ռուսական «Պոբեդա» ավիաընկերությունը 2016 թվականի նոյեմբերից սկսում է շաբաթական 3 անգամ թռիչքներ իրականացնել Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան:
