ԵՐԵՎԱՆ, 27 հոկտեմբերի — Sputnik. Մոսկվա-Երևան ուղևորափոխադրող ավտոբուսի վթարի հետևանքով զոհված ՀՀ քաղաքացիների ընտանիքներին և տուժած քաղաքացիներին ՀՀ կառավարության որոշմամբ կտրամադրվի 10 մլն դրամի աջակցություն: Այս մասին որոշումը կայացվել է այսօր ՀՀ կառավարության նիստում:
Կառավարության որոշմամբ, յուրաքանչյուր զոհվածի ընտանիքին կտրամադրվի 1.5 մլն դրամ, հիվանդանոցներում բուժումը շարունակող առավել ծանր վիճակում գտնվող վիրավորներից յուրաքանչյուրին` 700 000 դրամ, հիվանդանոցներում բժշկական օգնություն ստացած յուրաքանչյուր վիրավորին` 200 000 դրամ և ավտոբուսի մյուս բոլոր ուղևորներից յուրաքանչյուրին` 100 000 դրամ:
2016 թվականի հոկտեմբերի 14-ին Ռուսաստանի Դաշնության Հյուսիսային Օսեթիայիում` Բեսլան քաղաքից 6 կմ հեռավորության վրա, տեղի ունեցած Մոսկվա-Երևան ոչ կանոնավոր ուղևորափոխադրում իրականացնող ավտոբուսի վթարի հետևանքով տուժել էր 35 ՀՀ քաղաքացի, մահացել` 2-ը:
