ԵՐԵՎԱՆ, 26 հոկտեմբերի-Sputnik. 2003թ-ից մինչ օրս Վերակառուցման և զարգացման եվրոպական բանկը՝ ՎԶԵԲ-ը, Եվրամիության աջակցությամբ Հայաստանում իրականացրել է փոքր ու միջին ձեռնարկատիրությունների 1200 խորհրդատվություն: Խորհուրդների 94 տոկոսն, ըստ ծրագրի հեղինակների, արդյունավետ է եղել: Այդ մասին Sputnik Արմենիային հայտնեց ՎԶԵԲ-ի ՓՄՁ-ների ֆինանսավորման ու զարգացման խմբի «Խորհրդատվություն փոքր բիզնեսներին Հայաստանում» ծրագրի ղեկավար Տիգրան Աղաբեկյանը:
«Մենք ունենք գործիք, որով ծրագրի ավարտից մեկ տարի անց չափում ենք, թե ինչ արդյունք է տվել այն: Շուրջ 94 տոկոսով արդյունավետ են լինում դրանք»,- ասաց Աղաբեկյանը՝ հավելելով, որ խորհրդատվությունը կարող է լինել շուկայավարության, հաշվապահության, գործարար կառավարման, ինժեներական ուսումնասիրույունների ոլորտում:
Թե խորհրդատվություն ստացած ընկերություններից որոնք են հետագայում դադարեցրել իրենց աշխատանքը, խորհրդատուները տվյալ չունեն, քանի որ նման վիճակագրություն չի անցկացվում:
Տիգրան Աղաբաբյանը միաժամանակ նշեց, որ բոլոր մասնակից ձեռնարկությունները ծրագրի ավարտից մեկ տարի անց, ծրագիրն իրականացնողների այցի ժամանակ, աշխատելիս են եղել:
2003թ-ից իրականացված ՓՄՁ ծրագրերի ընդհանուր վարկավորման գումարը շուրջ 133 մլն եվրո է, որում հաշվարկված են նաև տնտեսվարողների ներդրումները: Նշված գումարից 9,9 մլն եվրոն տրամադրել է ՎԶԵԲ-ը:
