ԵՐԵՎԱՆ, 26 հոկտեմբերի — Sputnik. «Պոբեդա» ավիաընկերությունը սկսում է թռիչքներ իրականացնել Գյումրու «Շիրակ» օդանավակայանից, հայտնում են Քաղաքացիական ավիացիայի գլխավոր վարչությունից։
Ռուսական «Պոբեդա» ավիաընկերության հետ պայմանավորվածություն է ձեռք բերվել 2016 թվականի նոյեմբերից շաբաթական 3 անգամ Գյումրու «Շիրակ» օդանավակայանից դեպի Մոսկվայի «Վնուկովո» օդանավակայան, ինչպես նաև հետադարձ ուղղությամբ թռիչքներ իրականացնել:
Ավիատոմսերի սակագները լինելու են սկսած 10 հազար դրամից: Թռիչքները կատարվելու են ցերեկային ժամերին:
Նշենք, որ օրեր առաջ Քաղավիացիայի գլխավոր վարչությունը հայտնել էր, որ «Պոբեդա» ավիաընկերությունից հայտ չի ստացել թռիչքներ իրականացնելու մասին։ Սակայն մինչ այդ Ռոսավիացիան որոշել էր Մոսկվայից Գյումրու «Շիրակ» օդանավակայան չվերթեր իրականացնելու թույլտվություն տրամադրել «Պոբեդա» ավիաընկերությունը։
Վարչությունից հայտնել էին նաև, որ ՀՀ կառավարության ծրագրով նախատեսվում է ակտիվացնել Գյումրու «Շիրակ» օդանավակայանի գործունեությունը` բյուջետային ավիափոխադրողների ներգրավման ﬕջոցով:
«Պոբեդա» ավիաընկերությունը ստեղծվել է 2014թ.-ի սեպտեմբերին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։
