ԵՐԵՎԱՆ, 26 հոկտեմբերի — Sputnik. Շարբաթ Գուլան ծնվել է 1972թ-ին Աֆղանստանում։ 80-ական թթ-ի սկզբին նրա գյուղը հարձակման է ենթարկվել, և Շարբաթը որբացել է։ Աղջիկը մի քանի փրկված ազգականների հետ ապաստանել է Պակիստանի սահմանին գտնվող Նասիր Բաղ փախստականների ճամբարում։ Հենց այդտեղ էլ 1984թ-ին նրան նկատել է National Geographic-ի լուսանկարիչ Սթիվ Մաքարին, իսկ հետո փախստականի դիմանկարը հայտնվել է ամսագրի 1985թ-ի հունիսյան համարի շապիկին։ Այս մասին հայտնում է nat-geo.ru-ն։
1992թ-ին Շարբաթը վերադարձել է Աֆղանստան, սակայն հայրենիքում տիրող անհանգիստ իրավիճակը ստիպել է նրան կրկին լքել երկիրը։
Երիտասարդ կինը 2014թ-ից բնակվում է Պակիստանում, որտեղ փախստականներին հետ են ուղարկում։ Մարտական գործողությունների գոտի չվերադառնալու համար Շարբաթը կեղծ փաստաթղթեր է ձեռք բերել Շարբաթ Բիբի անունով։ Ոստիկանները մի քանի փախստականների հետ ձերբակալել են նաև նրան։
Եթե կնոջը միայն մեղադրեին Պակիստանի տարածքում անօրինական կերպով գտնվելու մեջ, ապա Շարբաթին պարզապես հետ կուղարկեին։ Սակայն կեղծ փաստաթղթերի առկայությունը բարդացրել է նրա դրությունը։ Այժմ նա ստիպված կլինի կանգնել դատարանի առաջ։ Կեղծ փաստաթղթերի համար նախատեսվում է 7-14 տարվա ազատազրկում և 3000 դոլարի տուգանք։
