ԵՐԵՎԱՆ, 26 հոկտեմբերի — Sputnik. Ֆուտբոլի Հայաստանի հավաքականի կիսապաշտպան Հենրիխ Մխիթարյանը կարող է հեռանալ անգլիական «Մանչեսթեր Յունայթեդից», գրում է Goal-ը` հղում անելով The Sun-ին:
Ըստ հրատարակության` Մխիթարյանը կհեռանա հունվարյան տրանսֆերային պատուհանի ընթացքում։
Աղբյուրի համաձայն՝ այս ամռանը Դորտմունդի «Բորուսիայից» տեղափոխված 27-ամյա Մխիթարյանին չի հաջողվել տպավորել «Մանչեսթեր Յունայթեդի» գլխավոր մարզիչ Ժոզե Մոուրինյոյին, որը չի թողնում նրան մասնակցել խաղերին:
Մխիթարյանը վաղուց վերականգնվել է վնասվածքից և մարզվում է, սակայն դեռ չի հայտավորվում «Մանչեսթեր Յունայթեդի» կազմում: Նա խաղադաշտից բացակայում է սեպտեմբերի 10-ից, երբ նրա ազդրի վնասվածքը կրկնվել էր «Մանչեսթեր Սիթիի» դեմ Պրեմիեր լիգայի խաղում:
Հոկտեմբերի 26-ին «Մանչեսթեր Յունայթեդն» Անգլիական լիգայի գավաթի խաղարկության 1/8 եզրափակիչի խաղում ընդունելու է «Մանչեսթեր Սիթիին»: Բրիտանական մամուլը ենթադրում է, որ Հայաստանի հավաքականի ավագը խաղադաշտ է վերադառնալու հենց այդ խաղում։
