ԵՐԵՎԱՆ, 25 հոկտեմբերի — Sputnik. «Գազպրոմի» վարչության նախագահ Ալեքսեյ Միլերը երեքշաբթի այցելել է «Գազպրոմ Արմենիայի» գրասենյակ և ընկերության աշխատակիցներին ներկայացրել նոր գլխավոր տնօրեն Հրանտ Թադևոսյանին, հայտնում է ընկերության կայքը։
Թադևոսյանը զբաղեցնում էր «Գազպրոմ Արմենիա» ՓԲԸ գլխավոր տնօրենի առաջին տեղակալի պաշտոնը մինչև Վարդան Հարությունյանի` Հայաստանի ՊԵԿ նախագահի պաշտոնում նշանակվելը։
Միլերը Երևանում հանդիպումներ է ունեցել նաև Հայաստանի նախագահ Սերժ Սարգսյանի և վարչապետ Կարեն Կարապետյանի հետ, որոնց ընթացքում կողմերը քննարկել են գազի ոլորտի հետ կապված համագործակցության հարցեր, գրված է ռուսական ընկերության հաղորդագրության մեջ։
Հատուկ ուշադրություն է դարձվել 2016-2017 թվականների աշուն-ձմեռ սեզոնի նախապատրաստմանը։ Նշված է, որ «Գազպրոմը» առաջիկա ձմռանն ապահովելու է սպառողների գազամատակարարումը։ Մասնավորապես կշարունակվի Աբովյանում գազի պահուստների ստեղծումը։ Հանդիպումների ժամանակ խոսվել է նաև հանրապետության գազամատակարարման գլխավոր սխեմայի և գազաֆիկացման մասին, որի նախագիծը նախապատրաստել է «Գազպրոմը»։
«Գազպրոմ Արմենիա» ՓԲԸ-ն «Գազպրոմ» ՀԲԸ 100-տոկոսանոց դուստր ընկերությունն է: «Գազպրոմ» ՀԲԸ Ընկերության միակ բաժնետերն է: «Գազպրոմ Արմենիա» ՓԲԸ ապահովում է Հայաստանի ներքին շուկայում բնական գազի մատակարարումն ու իրացումը:
