ԵՐԵՎԱՆ, 25 հոկտեմբերի — Sputnik. ԵԱՀԿ ՄԽ համանախագահների խնդիրը ԼՂ հակամարտության խաղաղ կարգավորումն է, և Հայաստանը պետք է աջակցի նրանց այդ ջանքերին, Sputnik Արմենիայի հետ զրույցում գնահատելով ԵԱՀԿ ՄԽ համանախագահների տարածաշրջանային այցը, նշեց ԱԺ արտաքին հարաբերությունների հանձնաժողովի նախագահ Արտակ Զաքարյանը։
Անդրադառնալով ամերիկյան կողմի ներկայացուցիչ Ջեյմս Ուորլիքի այն հայտարարությանը, թե որպես կարգավորման կարևոր նախապայման շարունակում է մնալ հրադադարի ռեժիմի պահպանումը, Արտակ Զաքարյանն ասաց.
«Հայկական կողմին երբևէ ձեռնտու չի եղել հրադադարի խախտումը, և հայկական կողմն այն երբեք չի խախտել։ Դրա հետ կապված մենք նշեցինք Վիեննայի և Սանկտ-Պետերբուրգի պայմանավորվածությունների հետևողականության անհրաժեշտությունը»։
Ինչ վերաբերում է ՀՀ և Ադրբեջանի նախագահների հնարավոր հանդիպմանը, մեր զրուցակիցը նշեց, որ հստակ ժամկետներ առայժմ չկան, բայց չբացառեց, որ այն կհաջորդի ԵԱՀԿ ԱԳ նախարարների հանդիպման շրջանակներում դեկտեմբերի 8-9-ը նախանշված ՀՀ և Ադրբեջանի ԱԳ նախարարների հանդիպմանը։
