ԵՐԵՎԱՆ, 24 հոկտեմբերի – Sputnik. Պետության ու հասարակության միջև բանավոր կնքված համաձայնագիրն իրեն սպառել է: Նման կարծիք հայտնեց Հայ-ամերիկյան առևտրային պալատի նախագահ Տիգրան Ջրբաշյանը՝ մեկնաբանելով նոր կառավարություն կազմելու անհրաժեշտությունը:
«Ցանկացած կառավարման մոդել արդյունք է պետություն-հասարակություն ինչ-որ չգրված համաձայնագրի: Պետությունն ու հասարակությունը ինչ-որ իմաստով կնքում են այդ համաձայնությունը: Պետությունն ասում է՝ ես քեզ կտրամադրեմ այս ծառայությունները, հասարակությունն էլ ասում է՝ ես էլ կդիմանամ այն ամենին, ինչ դու կանես պետության ներսում: Կարծում եմ` այս համաձայնագիրը սպառվել է, ժամկետն ավարտվել է, որի մասին վկայում են ապրիլյան պատերազմը և հետագա քաղաքական զարգացումները: Հետևապես անհրաժեշտություն կա նոր համաձայնագրի»,- ասաց Ջրբաշյանը:
Նոր համաձայնագիրը, նրա խոսքով, դարձան նոր ձևավորված կառավարությունն ու նրա ներկայացրած գործունեության ծրագիրը: Այս ծրագրի հետ, սակայն, տնտեսագետը մեծ հույսեր չի կապում և իրական տնտեսական բարեփոխումների իրականացման փաստաթուղթ չի համարում: Այն, նրա բնորոշմամբ, մի քանի կետերի վրա հիմնված դեկլարատիվ փաստաթուղթ է, որի նպատակն է վերացնել կառավարության և հասարակության միջև առկա անջրպետը:
«Սկզբունքային բարեփոխումների ուղղված ծրագիր դեռ չկա: Չկա, որովհետև չկա, թե ինչ ենք ուզում, ուր ենք գնում և ինչ ենք ստանալու արդյունքում»,- ասաց Տիգրան Ջրբաշյանը` այնուամենայնիվ կարծիք հայտնելով, որ որոշակի փոփոխություններ կլինեն, բայց որ դրանք կկրեն համակարգային, կառուցվածքային ու երկարաժամկետ ազդեցություն, դժվար է պատկերացնել:
Կառավարության գործունեության ծրագրի բովանդակության վրա, Տիգրան Ջրբաշյանի համոզմամբ, ազդել է կառավարության գործունեության ժամկետի սահմանափակումն ու այն հանգամանքը, որ նոր կառավարության գործունեությունը համընկել է նախընտրական փուլի հետ: Այս իրավիճակում, ըստ բանախոսի, դժվար է գնալ իրական ռադիկալ փոփոխությունների:
Տիգրան Ջրբաշյանի դիտարկմամբ` կառավարության ծրագիրը որոշակի հակասություններ ունի նաև նոր Հարկային օրենսգրքի հետ:
«Հարկային օրենսգրքի քաղաքականությունը և այն ուղղությունները, որ հնչեցված են կառավարության ծրագրում, իրար չեն համընկնում»,- ասաց տնտեսագետն ու կարծիք հայտնեց, որ առաջիկայում Հարկային օրենսգիրքը դարձյալ լուրջ փոփոխությունների կենթարկվի:
