ԵՐԵՎԱՆ, 23 հոկտեմբերի — Sputnik. Անգլիայի Պրեմիեր լիգայի 9-րդ տուրի «Չելսի» — «Մանչեսթեր Յունայթեդ» խաղին պարզ ու հասկանալի պատճառներով շատ լարված սպասում էր նաև հայ երկրպագուն: Հիասթափության հերթական պահը հասավ հանդիպման մեկնարկային կազմերին ծանոթանալուց հետո. Հենրիխ Մխիթարյանը կրկին բացակայում էր ոչ միայն մեկնարկային կազմում, այլ նաև մանկունյանցիների հայտացուցակից:
Իսկ խաղի առաջին իսկ րոպեին Պեդրոյի խփած գնդակից հետո «Ստեմֆորդ Բրիջում» մնացած 89 րոպեների ընթացքում խաղում էր «Չելսին» և կարմիր մարզաշապիկ կրող մի թիմ: Մի թիմ, որ ընդհանրապես կապ չուներ կարմիր սատանաների հետ:
Անգլիական որոշ լրատվամիջոցներ արդեն Հենրիխ Մխիթարյանին առաջարկություններ են անում այլ ակումբ տեղափոխվելու մասին: Չեմ կարծում, որ հիմա հայ ֆուտբոլիստի համար այդ պահն է: Բայց այն, որ մեր հավաքականի առաջատարը հայտնվել է հոգեբանական խորը «փոսի» մեջ, փաստ է:
Խաղաժամանակ չստանալով՝ մեր ֆուտբոլիստը չի կարող նաև մարզավիճակ ձեռք բերել: Բոլորս էլ սպասում էինք, որ Մխիթարյանը խաղադաշտ դուրս կգա Եվրոպայի լիգայի՝ «Ֆեներբախչեի» հետ խաղում: Սակայն այդ խաղում 4:1 հաշվով հաղթելուց հետո Մոուրինյոն կարող էր ասել, որ շատ ճիշտ է ընտրել հաղթական կազմը: Իսկ ազնվականների խաղից հետո ի՞նչ է ասելու Մոուրինյոն: Ռաուլի, Կասիլյասի ֆուտբոլային ճակատագրերի հետ «խաղալուց» հետո մի՞թե պորտուգալացին որոշել է հետք թողնել Մխիթարյանի կարիերայի վրա:
Փաստ չէ, որ եթե Մխիթարյանը թիմի կազմում լիներ, «Մանչեսթեր Յունայթեդը» չէր պարտվելու «Չելսիին»: Բայց այսպե՞ս: Այսպե՞ս խայտառակ խաղով: Միանշանակ այս մրցավեճում մանկունյանցիների մասին կարելի էր հիշատակել միայն նայելով ֆուտբոլիստների մարզահագուստներին:
Թիմի կիսապաշտպանության կենտրոնում չկար մի ֆուտբոլիստ, որը կարող էր ինչ-որ բան կազմակերպել հարձակվողների համար: Բացի այդ, տուգանային հրապարակում էլ հենակետային պաշտպանների փոխօգնության իսպառ չլինելու պայմաններում, լոնդոնցիները հնարավորություւն էին ստանում հարված կատարել և՛ միջին, և՛ հեռու տարածություններից:
Խաղի սկիզբը հիշեցրեց Հայաստան-Ռումինիա «տխուր» խաղի մեկնարկը: Ֆուտբոլիստները դեռ չէին տաքացել, բայց հաշիվն արդեն բացված էր:
Կենտրոնական պաշտպանների կոպիտ սխալից հետո, հանդիպման արդեն առաջին րոպեին հայտնվելով հետապնդողի դերում, «Ման.Յունայթեդը» դուրս չեկավ ցայտնոտից:
Խաղին կարելի է ասել ներկա չէր Զլատան Իբրահիմովիչը: Պարզ է, որ շվեդը կախված ֆուտբոլիստ է իր խաղընկերներից ու եզակի դեպքերում էր փոխանցում ստանում: Բայց առանց գնդակի էլ Զլատանը ոչ մի բան չէր անում ու ամբողջ խաղի ընթացքում ընդամենը մեկ վտանգավոր հարված կատարեց:
Վերջին անգամ սեփական հարկի տակ Յունայթեդը «Չելսիին» 0:4 հաշվով պարտվել էր 1968 թվականին, ճիշտ է՝ 2001 թվականին էլ «Չելսին» Մանչեսթերում հաղթել էր խոշոր՝ 3:0 հաշվով:
Սա միանշանակ խայտառակութուն էր մանկունյացիների համար ու ապտակ ոչ միայն նրանց, այլ նաև՝ Մոուրինյոյի հեղինակությանը:
Հիմա արդեն Ժոզեն դժվարությամբ է արդարանալու: Հիմա արդեն խոսքերով ոչ ոքի ոչ մի բան չես ապացուցի: Պետք է խաղ ցուցադրել ու արդյունքի հասնել: Եվ դրա համար մեկ կամ երկու խաղը բավարար չի լինելու:
Ստացվում է, որ իր նոր թիմի համար ամենածանր հատվածում կարող է խաղադաշտ դուրս գալ Հենրիխ Մխիթարյանը: Ու պատկերացնու՞մ եք, թե ինչ որակյալ մանրադիտակով են դիտելու անգլիացիները հայ ֆուտբոլիստի խաղը: Նորից արգելք պետք է հաղթահարել: Մեծ հաշվով, եթե Մխիթարյանը դուրս գա խաղադաշտ, նա պարզապես պետք է ձգտի ցուցադրել իր որակները: Այստեղ էլ կարող է խնդիր առաջանալ, որովհետև մանկունյանցիների համագործակցությունը խաղադաշտում այս պահին շատ վատ մակարդակի վրա է:
Սպասենք, ու տեսնենք թե երբ խաղադաշտում կլինի մեր ֆուտբոլիստը և հուսանք, որ նրա մուտքը խաղադաշտ վերջապես ժպիտ կպարգևի «Յունայթեդի» երկրպագուներին:
