ԵՐԵՎԱՆ, 22 հոկտեմբերի — Sputnik. «Բելավիա» ավիաընկերության՝ Կիևից Մինսկ ուղևորված ինքնաթիռը Կիև են վերադարձրել «հակամայդանական» Արմեն Մարտիրոսյանի պատճառով, որը Կիևից Մոսկվա էր մեկնել 2014 թվականին։ Այս մասին հայտնում է ՌԻԱ Նովոստին` հղում անելով strana.ua-ին։
«Ինչ և ինչպես է տեղի ունեցել… Ինչ միջոցներ են ձեռնարկվելու։ Կպատմեմ իրավաբանների հետ խորհրդակցելուց հետո», — Facebook-ի իր էջում գրել է Արմեն Մարտիրոսյանը։
Ավիաընկերությունը նախօրեին հայտնել էր, որ «Բելավիա» ավիաընկերության Boeing 737-800 ինքնաթիռը, որն իրականացնում է Կիև (Ժուլյանի)- Մինսկ В2-840 չվերթը, ստիպված է եղել վերադառնալ այն օդանավակայան, որտեղից մեկնել էր։ Օդանավում եղել է 136 ուղևոր և անձնակազմի վեց անդամ։
Ընկերության տվյալներով Բելառուսի օդային տարածք մտնելուց 50 կմ հեռավորության վրա օդաչուն կարգավարից հրահանգ է ստացել անհապաղ վերադառնալ մեկնման օդանավակայան՝ առանց բացատրություն տալու։
Նաև հայտարարվել է, որ հրամանը չկատարելու դեպքում օդ կբարձրացվեն կործանիչներ։ Օդաչուն կատարել է կարգադրությունը:
«Վայրէջք կատարելուց հետո Ուկրաինայի իրավապահ մարմինները օդանավից դուրս են բերել մի ուղևորի` Հայաստանի քաղաքացի, լրագրող Արմեն Մարտիրոսյանին։ Վերալիցքավորվելուց հետո օդանավը մեկնեց Մինսկ և «Մինսկի» ազգային օդանավակայանում բարեհաջող վայրէջք կատարեց տեղի ժամանակով 17։33-ին», — միջադեպի մանրամասներն է հաղորդում ուկրաինական պարբերականը։
Ավիաընկերության տվյալով՝ Ուկրաինայի իրավապահ մարմիններն Արմեն Մարտիրոսանին ազատ են արձակել, և նա «Բելավիա» ավիաընկերության հաջորդ չվերթով մեկնել է Մինսկ։
«Բելավիայից» նաև հայտնել են, որ Ուկրաինայի օդային երթևեկության սպասարկման պետական ձեռնարկությունից փոխհատուցում կպահանջեն՝ օդանավը հետ ուղարկելու համար։
Մարտիրոսյանը Facebook-ի իր էջում գրել է, որ արդեն Մոսկվայում է։ Այն հարցին, թե ինչու են նրան բերման ենթարկել, իսկ հետո ազատ արձակել, նա պատասխանել է. «Զանգ ընկերոջը. դա շատ բան է որոշում»:
Ուկրաինայի անվտանգության ծառայությունը մինչև հիմա այս միջադեպի վերաբերյալ որևէ պարզաբանում չի արել:
