ԵՐԵՎԱՆ, 21 հոկտեմբերի — Sputnik. Առողջապահության նորանշանակ նախարար Լևոն Ալթունյանը հանդես է եկել աննախադեպ նախաձեռնությամբ. թանկարժեք հետազոտությունների կարիք ունեցող հիվանդները, որոնց պետպատվերով սպասարկելու համար բուժկենտրոնները գումար չունեն և հերթագրել են դիմողներին, մեկ շաբաթից կարող են օգտվել այդ ծառայություններից՝ նախարարության հետ կնքած պայմանագրերի հիման վրա։
Առողջապահության նախարարը տեղյակ է՝ ամենուր քաղաքացիներին հերթագրում են՝ ասելով, որ դժվարամատչելի ախտորոշիչ հետազոտությունների ծրագրի 2016 թ.-ի ֆինանսավորումն ավարտվել է։
Խնդրի լուծման նպատակով նախարարությունն ուսումնասիրել է բժշկական կազմակերպություններում պետպատվերով մատուցվող ծառայությունների, առաջին հերթին՝ թանկարժեք մագնիսառեզոնանսային շերտագրման, համակարգչային տոմոգրաֆիական և այլ հետազոտությունների գները։
Բուժկազմակերպությունների ղեկավարների հետ պայմանավորվածություն է ձեռք բերվել պետական պատվերով փոխհատուցվող դժվարամատչելի ախտորոշիչ հետազոտությունների գները համահունչ դարձնել շուկայական արժեքին, իսկ պետբյուջեի սահմանափակ միջոցների հաշվին ավելի մեծ թվով մարդկանց սպասարկել։
Պայմանագրեր են կնքվել, և մեկ շաբաթից ուղեգիր ունեցող քաղաքացիները հնարավորություն կունենան անցնելու անհրաժեշտ հետազոտությունները։
Նախարարը նաև հայտնեց, որ ներդրել են չափորոշիչներ, որոնցով աշխատելու են բժիշկները և որոնց հիման վրա գնահատելու են նրանց աշխատանքը։
Լևոն Ալթունյանը նշեց, որ պատրաստվում է համակարգային փոփոխությունների գնալ ոլորտում, իսկ առաջին արդյունքների մասին կհայտնեն մի քանի ամիս անց՝ տարեսկզբին։
