ԵՐԵՎԱՆ, 21 հոկտեմբերի — Sputnik. ԶՈՒ անձնակազմը խնդիրներ չունի «Իսկանդեր Մ» համալիրների օգտագործման համար, ունի համապատասխան մասնագետներ, որոնք մինչև համալիրը ձեռք բերելը, ուսումներ էին անցել: Այս մասին լրագրողներին ասաց ՀՀ ԶՈՒ Հրթիռային զորքերի և հրետանու վարչության շտաբի պետի տեղակալ, գնդապետ Արտավազդ Յաղմուրյանը:
«Իսկանդեր համակարգերը ձեռք բերելուց առաջ արդեն պատրաստվել էին համապատասխան մասնագետներ: Հենց նրանք էլ Հայաստանում ընդունել են «Իսկանդեր» համակարգերը: Այսինքն, Հայաստանը դրանց կիրառման ոչ մի բարդություն չունի՝ տեխնիկական առումով», — ասաց Արտավազդ Յաղմուրյանը:
Նրա խոսքով` այսօր ռազմաքաղաքական ղեկավարության առջև «Իսկանդերները» կիրառելու խնդիր դրված չէ, սակայն անհրաժեշտության դեպքում պատրաստ են կիրառել։ Յաղմուրյանն ընդգծեց, որ ապրիլյան քառօրյայի ժամանակ ՀՀ ԶՈՒ ստորաբաժանումները մարտական բարձր աստիճանի էին բերված։
«Իսկանդերի» մարտական մասը կես տոննա է կշռում և կարող է ճշգրիտ հարված հասցնել 280 կմ հեռավորության վրա:
«Հիմա պատկերացրեք, թե ինչպիսի ավերածություններ կարող է անել «Իսկանդերը», որի առավելագույն շեղումը կարող է 8-10 մետր լինել»,- նշեց Յաղմուրյանը։
Նրա խոսքով` «Իսկանդերին» զիջում է անգամ «Երկաթե գմբեթ» հակահրթիռային համակարգը, որը նախատեսված չէ լայնածավալ ռազմական գործողությունների համար։
ՀՀ ԶՈՒ սպառազինության վարչության զրահատանկային ծառայության շահագործման և պլանավորման բաժնի պետ, գնդապետ Զորայր Գաբրիելյանը նշեց, որ Հայաստանը ունի «Սմերչ» համազարկային ռեակտիվ համակարգերի կառավարման նեղ մասնագետներ, որոնք 1996 թվականից նախապատրաստվում և սովորում են Ռուսաստանում։
Նրա խոսքով` համացանցում հաճախ են լուրեր պտտվում, թե հայկական տանկերն իբր պաշտպանված չեն։ Սակայն բանն այն է, որ աշխարհում տանկային որևէ կորպուս լիարժեք պաշտպանված լինել չի կարող։ Այսօր աշխարհն ակտիվ պաշտպանական համակարգի տարբեր մշակումներ է իրականացնում։
«Մեր հիմնական նպատակը տանկերի արդիականացումն է մինչև Տ-72Բ3 մակարդակի: Որոշ աշխատանքներ նախատեսում ենք իրականացնել մեր ուժերով, որոշներն իրականացնելու ենք Ռուսաստանի հետ համագործակցությամբ», — ասաց Գաբրիելյանը։
Նրա խոսքով` պայմանագրերի և համաձայնագրերի համաձայն Հայաստանը ձեռք կբերի նորագույն համակարգեր և միջոցներ, սակայն բոլոր աշխատանքները կիրականացվեն Հայաստանի տարածքում: Այդպես անհամեմատ ավելի քիչ ծախսատար կլինի, քան Ռուսաստանի տարածքում արդիականացնելը:
«Մենք ունենք համապատասխան տեխնիկական և գիտական բազա: Որպես օրինակ նշեմ, որ տանկերի ջերմացույցները կարտադրվեն Հայաստանում»,- ասաց նա` նշելով, որ Հայաստանում արդիականացվող տանկերի վրա հնարավոր է դինամիկ պաշտպանության այլ համակարգ տեղադրվի:
